په کندهار کې د پیازو حاصلات زیات شوي دي
د کندهار د کرنې، اوبو لګولو او مالدارۍ ریاست ویلي چې په روان کال کې د دې ولایت د پیازو حاصلات د تېر کال پرتله زیات شوي دي.
د دې ریاست د کرنیزو چارو آمر مولوي شمس الرحمن موسی رسنیو ته ویلي، سږ کال د کندهار په مرکز او ولسوالیو کې شاوخوا ۱۹۵۰ هکتاره ځمکه کې پیاز کرل شوي وو، چې له هغې څخه له ۶۸ زرو ټنه زیات پیاز راټول شوي دي.
نوموړي زیاته کړې، که څه هم د پیازو کرل شوې ځمکه د تېر کال پرتله لږه شوې، خو د حاصل مقدار زیات شوی دی. تېر کال له ۲۰۵۰ هکتاره ځمکې څخه ۷۱ زره ټنه پیاز ترلاسه شوي وو.
مولوي موسی د دې زیاتوالي لامل د آفت ضد درملو منظم تطبیق او ښه اوبو لګونه ښودلې ده. هغه دا هم ویلي چې د کندهار یوه برخه د پیازو محصول نه یوازې د کورني بازار لپاره وېشل کېږي، بلکې گاونډیو هیوادونو لکه هند او پاکستان ته هم صادرېږي.
سره له دې پرمختګ، خو د دوامدار دولتي ملاتړ نشتوالی، د صادراتي جوړښتونو ته کم پاملرنه، او د طالبانو حکومت له خوا بزګرانو ته د لازم خدماتو نه برابریدل هغه لویې ستونزې دي، چې ښايي په راتلونکي کې پر کرنیزو تولیداتو منفي اغېز وکړي.
