جبهه مقاومت ملی د پنجشېر په یوه طالبمیشته قرارګاه برید کړی
د افغانستان د جبهه مقاومت ملي د یوې خبرپاڼې له مخې، د دې جبهې غړو د دوشنبې په ماښام د پنجشېر ولایت د دره سیمې په یوه طالبمیشته قرارګاه هدفمند برید کړی دی. د خبرپاڼې له مخې، د دغه راکټي برید او چاودنې په پایله کې ۱۷ طالب جنګیالي وژل شوي دي.
په خبرپاڼه کې راغلي چې یاده هدف شوې قرارګاه د منجستو کلي په دره عبداللهخېل سیمه کې موقعیت لري، چې د طالبانو له مهمو مرکزونو څخه ګڼل کېږي. جبهه مقاومت ملي زیاتوي، دغه عملیات په دوو پړاوونو کې طرحه شوي و؛ لومړی بریدکوونکو بمونه ځای پر ځای کړي، بیا یې د طالبانو پر سنګرونو راکټونه ویشتي.
د پنجشېر سیمهییزو سرچینو هم دغه شپه د چاودنو او وسلهوالو نښتو راپورونه تأیید کړي؛ خو د طالبانو حکومت ویندویانو تر دا مهاله د پېښې جزئیات نه دي رسنیز کړي.
جبهه مقاومت ملي چې د جمهوري دولت تر سقوط وروسته په پنجشېر کې راښکاره شوه، په تېرو څلورو کلونو کې یې د هېواد په څو ولایتونو کې له طالبانو سره جګړې کړې دي. د دغې جبهې مشر احمد مسعود تل ویلي چې طالبان د سیاسي خبرو اترو اراده نه لري او وسلهوال مقاومت د دغې ډلې د زور واکمنۍ د پای ته رسولو یوازینۍ لاره ګڼي.
د پنجشېر او شمالي سیمو شخړې ښيي چې د هېواد امنیتي وضعیت لا هم نازک دی. شنونکي باور لري چې د طالبانو د ادارې چوپتیا د دغسي بریدونو پر وړاندې ښايي د دوی د نظامي جوړښت ضعف ته اشاره وي.
