په هلمند کې د روغتیایي ودانیو کمښت؛ ۷۰ سلنه روغتیایي مرکزونه لا هم بې ودانیو دي
د هلمند د عامې روغتیا ریاست ویلي، له هغه وروسته چې د طالبانو اداره واک ته رسېدلې، د دې ولایت شاوخوا ۳۰ سلنه روغتیایي مرکزونو ته ودانۍ جوړې شوې دي، خو لا هم نږدې ۷۰ سلنه مرکزونه، په ځانګړي ډول په ولسوالیو او لرې پرتو سیمو کې، بې له ودانیو فعالیت کوي. دغه حالت د معیاري روغتیایي خدماتو ته د خلکو لاسرسی په جدي ډول محدود کړی دی.
د هلمند د باباجي ولسوالۍ اوسېدونکي وايي، ګڼ روغتیایي مرکزونه په خامو او غیر معیاري ځایونو کې کار کوي او د مناسبې ودانۍ نشتون د خدماتو کیفیت، حفظالصحې او د درملو ساتنې چارې زیانمنې کړي دي. دوی زیاتوي چې دا مرکزونه نه یوازې د طبیعي پېښو پر وړاندې خوندي نه دي، بلکې له اړینو لومړنیو امکاناتو هم بې برخې دي.
یو شمېر اوسېدونکي د اندېښنې په څرګندولو سره له د طالبانو ادارې غواړي چې معیاري روغتیایي کلینیکونه جوړ کړي. حکمتالله، چې د باباجي یو اوسېدونکی دی، وایي په خامو مرکزونو کې آن دوړې هم پر درملو پرېوځي. جمعهخان، د دې ولسوالۍ بل اوسېدونکی، ټینګار کوي چې د یوه معیاري کلینیک جوړول کولای شي د خلکو ډېری روغتیایي ستونزې راکمې کړي.
په همدې حال کې، ډاکټر نقیبالله فاتح، د هلمند د عامې روغتیا رئیس، وايي د طالبانو د بیا واکمنېدو وروسته که څه هم ځینې ودانۍ جوړې شوې دي، خو د دې ولایت ډېری روغتیایي مرکزونه لاهم بې ودانیو پاتې دي. نوموړي وویل، دا وضعیت څرګندوي چې د روغتیايي برخې پلانونه او پانګونه، په ځانګړي ډول په ولسوالیو کې، د خلکو پراخې اړتیاوې نه شي پوره کولای.
د هېواد په جنوبي ولایتونو کې د معیاري روغتیا مرکزونو کمښت، په تېره د لرې پرتو سیمو کې، ماشومان، ښځې او زړښځې اړ کړي چې د لومړنیو روغتیايي خدماتو د ترلاسه کولو لپاره اوږده واټنونه ووهي. دا موضوع د طالبانو د ادارې له لوري د خلکو د مساوي روغتیايي اسانتیاوو د برابرولو په برخه کې نیوکې زیاتې کړې دي.
