طالبان د عيد تر مخه په نهو ولايتونو کې د بازارونو څارنه زياته کړې
د طالبانو د حکومت د امر بالمعروف او نهي عن المنکر وزارت ويلي چې د عيد تر رسېدو سره هممهاله، د دې وزارت محتسبانو په نهو ولايتونو کې د بازارونو څارنه پياوړې کړې ده.
د دې وزارت له لوري په يوه خپره شوې خبرپاڼه کې راغلي چې د دې څارنو موخه د سوداګريزو توکو د زېرمه کولو (احتکار) مخنيوی، د سرغړونو راکمول او د بازار په معاملهوو کې د شفافيت تامين بلل شوی دی. دا څارنه د پنجشير، پروان، ميدان وردګ، زابل، تخار، بغلان، لوګر، بلخ او کابل ولايتونه نيسي.
وزارت د دې څارنو د څرنګوالي او عملي پايلو په اړه نور جزئيات نه دي ورکړي. دا په داسې حال کې ده چې د عيد تر مخه معمولاً د توکو د بيې لوړېدو او د اړينو موادو د کموالي له امله د خلکو اندېښنې زياتېږي.
په وروستيو کلونو کې، د دې وزارت رول او واکونه په بېلابېلو ټولنيزو او اقتصادي برخو کې د بحث وړ موضوع پاتې شوې ده. سره له دې چې وزارت د څارنو د زياتېدو اعلان کړی، يو شمېر اوسېدونکي ټينګار کوي چې د بيې د کنټرول او د احتکار د مخنيوي لپاره روڼ او ځواب ورکوونکي ميکانيزمونه اړين دي، تر څو پر خلکو اقتصادي فشار راکم شي.
