فایق: د طالبانو تګلارې د افغانستان کړکېچونه نور هم ژور کړي دي
نصیر احمد فایق، د ملګرو ملتونو سازمان کې د افغانستان دایمي استازي سرپرست، د امنیت شورا په غونډه کې وویل چې د طالبانو د بیا واکمنېدو له پنځم کال ته د نږدې کېدو سره، نړیوالې ټولنې ته دا روښانه شوې ده چې دغه ډله د خپل چلند، منځلاریتوب او د افغان ولس د اړتیاوو د پوره کولو لپاره هېڅ جدي ګام نه دی اخیستی.
هغه ټینګار وکړ چې برعکس، د طالبانو د واکمنۍ سیاستونه لا زیات سخت، انحصاري او ځپونکي شوي، او هېواد یې له بشري، سیاسي، ټولنیزو او اقتصادي کړکېچونو سره مخامخ کړی دی. د نوموړي په وینا، دا حالت د هغو تګلارو مستقیمه پایله ده چې پر فشار او وېرو جوړې او عملي شوې دي.
فایق د ښځو او نجونو د پراخو محدودیتونو په اړه وویل چې هغوی له ټولنیز ژوند څخه په بشپړ ډول لیرې شوي، مدني فضا له منځه تللې، اقتصادي جوړښتونه سخت زیانمن شوي او یوه بشپړه نسل د زده کړو له حقه بېبرخې پاتې شوې ده. ده څرګنده کړه چې دغه پایلې تصادفي یا ناڅاپي نه دي، بلکې د طالبانو د ادارې د خبرتیا او پرېکړو نتیجه ده.
د افغانستان دایمي استازي سرپرست همداراز د هغه چلند پر ضد نیوکه وکړه چې د «عملپاله تعامل» په نوم له طالبانو سره تعقیبېږي، او ویې ویل که د دغه ډول تعامل تر شا بنسټیز بدلونونه رامنځته نه شي، دا به په افغانستان کې د تلپاتې سولې، ثبات او هوساینې لامل نه شي. فایق غوښتنه وکړه چې باید د ملګرو ملتونو تر مشرۍ لاندې یو نوی بهیر رامنځته شي، څو د افغان ولس د ارادې پر بنسټ یو مشروع او هر اړخیز سیاسي نظم او اساسي قانون جوړ شي.
فایق په خپلو څرګندونو کې له امنیت شورا وغوښتل چې د پاکستان له خوا د افغانستان پر ملکي سیمو او بنسټونو بریدونه بند کړي. نوموړي زیاته کړه، لکه څنګه چې طالبان د افغان ولس استازیتوب نه کوي، همداسې د دې ډلې د تګلارو له امله رامنځته شوې تاوتریخوالي — په ځانګړي ډول د ترهګریزو ډلو پناه ورکول — هم د افغانستان د وګړو د غوښتنو او ارادې استازیتوب نه کوي.
