د افغان کډوالو د استوګنې پر سر د بریتانیا د دفاع وزارت چوپتيا ‘د دفاع وړ نه ده’
اندرو دیویس، د بریتانیا د پارلمان محافظهکار غړی چې د جنوبي ویلز استازیتوب کوي، د افغان کډوالو د استوګنې پروګرامونو په اړه د دفاع وزارت له نشت شفافیت څخه سخت انتقاد کړی او دا چاره یې ‘د دفاع وړ نه ده’ بللې ده.
دیویس زیاته کړې چې دفتر یې سږ کال د اکتوبر په میاشت کې د بریتانیا له دفاع وزارت څخه په رسمي ډول د هغو ځایونو په اړه معلومات غوښتي وو چې د افغان کډوالو د استوګنې لپاره ترې ګټه اخیستل کېده، لکه د رووز ښار ‘هالیدې اېن ایکسپریس’ هوټل، او همداراز یې د عام امنیت او جرمي کچې اړوند ارقام غوښتې وو.
خو دی وايي، له پرلهپسې تعقیبونو سره سره، بریتانوي دفاع وزارت ځواب نه دی ورکړی، چې له امله یې یوه رسمي شکایت د بریتانیا د معلوماتو کمېسیون ته وړاندې شوی. دغه کمېسیون بیا شکایت نه دی منلی، ځکه چې شکایت کوونکی د هغه چا سره یو نه و، چې په لومړي سر کې یې د معلوماتو غوښتنه ثبت کړې وه.
دیویس دا پرېکړه ‘غیرمعمولي’ بللې او خبرداری یې ورکړی چې دا ډول چلندونه کولی شي د حکومتي ادارو پر شفافیت د عامو خلکو باور ته سخت زیان ورسوي.
د اندرو دیویس دغه څرګندونې په داسې وخت کې کېږي چې د سکای نیوز یوه تازه څېړنه ښيي، ځینو هغو کسانو چې د بیا استوګنې غوښتونکي دي، د خپل تعامل او همکارۍ په اړه له بریتانوي ځواکونو سره مبالغهامې یا ناسمې څرګندونې کړې دي.
دیویس د معلوماتو له کمیشنر څخه غوښتي، چې خپله پرېکړه ژر تر ژره بیا وکتل شي او د افغان کډوالو د بیا استوګنې بهیر په اړه دقیق، موثق او د تصدیق وړ معلومات عامو خلکو ته ورکړل شي، څو د څارنې او ځوابویینې زمینه برابره شي.
