د طالبانو د ادارې يو مقام: د پاکستان رژيم له اسلامي احکامو بېګانې دی
د طالبانو د دفاع وزارت د لويې درستيزۍ د صحي قوماندانۍ يو مقام ويلي چې د پاکستان خلک مسلمانان دي، خو د دغه هېواد حاکم رژيم د اسلامي احکامو او شعائرو اړين پوهه او التزام نه لري.
دغه مقام د پاکستان پوځي حاکميت له هغه کارګر سره تشبيه کړی چې يوازې د مزد په خاطر کار کوي، نه د اسلامي ښوونو پوهه لري او نه ځان د هغو د پلي کولو مسوول ګڼي. د ده په وينا، دا ډول چلند د پاکستان د واک جوړښت له مذهبي ارزښتونو څخه لېرې کړی دی.
هغه همدارنګه ادعا کړې چې د “په بشپړ ډول اسلامي نظام” د حاکمېدو لپاره په پاکستان کې د رژيم بدلون بايد د خلکو په فشار او غوښتنه ترسره شي؛ هغه څرګندونې چې کولاى شي د سيمې سياسي او امنيتي حساسيتونه زيات کړي.
په عين وخت کې، يو شمېر شنونکي وايي چې د پاکستان د پوځي او استخباراتي بنسټونو تاريخي رول، چې د دوی په باور ريښه يې د استعمار له دورې پاتې جوړښتونو کې ده، تل د بحث وړ موضوع پاتې شوی دی. دا شنونکي ادعا کوي چې دغه بنسټونه، هم دننه په هېواد او هم په سيمه کې، داسې پاليسۍ تعقيبوي چې د مسلمانانو د ټولنو د ځينو برخو له ګټو او غوښتنو سره په ټکر کې دي؛ هغه موضوع چې په تېر کې هم پراخ غبرګونونه او نيوکې راپارولې دي.
