د یو آلماني ورځپاڼې د راپور له مخې د زلنسکي سیاسي وضعیت له امریکا د اقدام وروسته حساس شوی
یو آلماني ورځپاڼه راپور ورکوي چې د امریکا د متحده ایالاتو له اقدام وروسته د اوکراین د ولسمشر ولودیمیر زلنسکي سیاسي حالت حساس او له خطره ډک پړاو ته داخل شوی دی.
د «برلینر سایتونګ» ورځپاڼې د راپور له مخې، د امریکا ولسمشر ډونالد ټرمپ د وینزوېلا پر وړاندې د برید او د هغه هېواد د ولسمشر نیکولاس مادورو د تښتولو له لارې داسې وضعیت رامنځته کړی چې د زلنسکي هر ډول غبرګون کولی شي د کییف لپاره جدي پایلې ولري.
په راپور کې ټینګار شوی چې د وینزوېلا کړکېچ د زلنسکي لپاره د ماین ډګر په څېر دی؛ یعنې هر ډول بېړه یا ناسم دریځ به د هغه سیاسي موقعیت لا پسې کمزوری کړي.
ورځپاڼه زیاتوي چې اروپایي اتحادیه هم له ورته وضعیت سره مخ ده، ځکه اروپایي هېوادونه اندېښنه لري چې د امریکا د اقدام پر وړاندې هر ډول نامناسب غبرګون به د واشنګټن نارضایتي رامنځته کړي؛ هغه اندېښنه چې په پایله کې د اوکراین سياسي دریځ نور هم کمزوری کولی شي.
د دې ورځپاڼې د څرګندونو له مخې، د یوه خپلواکه هېواد د ولسمشر د تښتونې اقدام د امریکا له خوا د نړۍ په ډېرو برخو کې له منفي غبرګونونو سره مخ شوی دی.
