زلنسکي د پوتين پر استوګنځي د بريد تور رد کړ
د اوکراین ولسمشر وولودیمیر زلنسکي د روسیې د نووګورود ښار په استوګنځي د ولادیمیر پوتین د احتمالي بې پېلوټه الوتکې برید ادعا رد کړه او ویې ویل چې هېواد یې په دې پېښه کې هېڅ رول نه لري.
د رسنیو د راپور له مخې، زلنسکي په ورته وخت کې خبرداری ورکړی چې روسیه ښایي په کیف کې د اوکراین پر دولتي ودانیو احتمالي بریدونه طرحه کړي وي، هغه ادعا چې نوموړي وویل کولی شي د اوسنۍ کړکېچنې فضا یوه برخه وي.
دغه څرګندونې وروسته له هغه وشوې چې د روسیې د بهرنیو چارو وزیر، سرګي لاوروف، اوکراین تورنه کړه چې د روسیې د ولسمشر استوګنځی یې په نښه کړی. زلنسکي دا ادعاوې رد کړې او ویې ویل چې دا ډول روایتونه کیدای شي سیاسي اهداف ولري.
د اوکراین ولسمشر همدارنګه څرګنده کړه چې کرملین هڅه کوي د اوکراین او متحده ایالاتو ترمنځ د سولې د خبرو پرمختګ له اصلي لارې واړوي. هغه له د امریکا د ولسمشر ډونالډ ټرمپ، د ده له ټیم او اروپایي شریکانو غوښتنه وکړه چې د روسیې دغو ادعاوو ته غبرګون وښيي.
زلنسکي په پای کې له واشنګټن وغوښتل چې د روسیې پر هغه څه چې نوموړي یې ګواښونه وبلل، متناسب غبرګون وښيي.
