ذبیحالله مجاهد: که ایران مرسته وغواړي، افغانستان چمتو ده
د طالبانو د حکومت ویاند ذبیحالله مجاهد ویلي چې که له تهران څخه هر ډول د مرستې غوښتنه وشي، افغانان تیار دي د خپلې وسې تر کچې له ایران سره مرسته وکړي. نوموړي ایران «پیاوړی» هېواد بللی او ویلي چې په وروستیو ۱۲ ورځو جګړه کې د اسرائیل پر وړاندې ایران بریالی شوی دی.
مجاهد د رسنیو سره په خبرو کې د واشنګټن له لوري د تهران پر ضد د ګواښونو په اړه ویلي، که متحده ایالات هم پوځي اقدام وکړي، د ده په باور ایران به بیا هم بریالی شي. د هغه په وینا، ایران د خپل دفاع توان لري او دا حق د هغه هېواد لپاره محفوظ دی.
دا څرګندونې په داسې حال کې کېږي چې په تېرو میاشتو کې د ایران او اسرائیل ترمنځ ترینګلتیا زیاته شوې ده او امریکا هم په ځینو مواردو کې د تهران پر وړاندې سخت دریځ نیولی دی. هغه ۱۲ ورځنۍ جګړه چې یادونه یې شوې، د اوربند له پرېکړې سره پای ته رسېدلې ده.
د طالبانو د حکومت د ویاند تازه څرګندونې د یوې سیمهییزې شخړې په تړاو په داسې وخت کې شوې دي چې دا اداره لا هم د ډېرو هېوادونو له لوري په رسمیت نه ده پېژندل شوې او دننه په افغانستان کې له پراخو سیاسي، اقتصادي او بشري ستونزو سره مخ ده. سره له دې، د طالبانو چارواکي وخت ناوخت د سیمه ییزو پېښو په اړه خپل دریځ څرګندوي.
