په سویداء کې د یو سوری سیاسي فعال ترور؛ خلک د شفافو تحقیقاتو غوښتنه کوي
سوری رسنۍ راپور ورکوي چې د دې هېواد یو سیاسی فعال انور فوزات الشاعر، د سویداء ولایت په یوه امنیتي پېښه کې ترور شوی او خپل ژوند یې له لاسه ورکړی دی. دا پېښه د یو سیاسي ترور په توګه توصیف شوې، خو تر اوسه یې عاملین نه دي پېژندل شوي.
د یادو راپورونو پر بنسټ، الشاعر مخکې د سوریې د دروزیانو د معنوي مشر، حکمت الهجري، له دریځونو نیوکه کړې وه؛ هغه موضوع چې د ناظرینو په اند ښایي د دې پېښې له انګیزې سره تړاو ولري.
تر دې مخکې هم دوه نور سوری کسان، چې رائج المتنی او ماهر الفلحوط نومېدل، په ورته پېښو کې وژل شوي وو؛ راپورونه د دې بریدونو پړه د الهجري پلویانو پر غاړه اچوي.
د الشاعر تر ترور وروسته، د سویداء اوسېدونکو غبرګونونه ښودلي او د پراخو، شفافو او بېطرفو تحقیقاتو غوښتنه یې کړې ده. له دې سره هممهاله یادونه شوې چې الهجري پخوا په یوه پیغام کې د رژیم صهیونیستي له لاسوهنې مننه کړې چې د دروزیانو د ملاتړ په پلمه یې سویداء ته مداخله کړې، او همداراز یې د متحده ایالاتو ولسمشر ډونالډ ترمپ یادونه هم کړې وه.
دا پېښه په سوریه کې د سیاسي فعالانو د ترور د وروستي موج یوه برخه ګڼل کېږي؛ هغه لړۍ چې د بشارالاسد تر نسکورېدو وروسته راپیل شوې او د امنیتي وضعیت او د مسوولو ادارو د ځواب ویلو په اړه اندېښنې زیاتې کړې دي.
