نړیوال د خوړو پروګرام: هممهاله کړکېچونه افغانستان د لا ډېرې لوږې پر لور بیایي
نړیوال د خوړو پروګرام ویلي، د افغانستان او پاکستان د پولې تړل کېدل او له دې سره یو وخت د سیمې د نښتو زیاتېدل، له اړتیاوالو سره د مرستو رسونې بهیر له جدي ستونزو سره مخ کړی دی. دغه اداره خبرداری ورکړی چې د بېثباتۍ دوام کولای شي په هېواد کې میلیونونه کسان د لا شدیدې لوږې له ګواښ سره مخ کړي.
دغه اداره د شنبې په ورځ په یوه خبرپاڼه کې ویلي، دا مهال له شلو زرو ډېرو کورنیو ته چې د پاکستاني ځواکونو او طالبانو اړوند جنګیالیو ترمنځ د جګړو له امله بېځایه شوي، د خوراکي توکو مرسته رسوي. د دغې ادارې په وینا، ډېری له دې کورنیو مخکې له دې هم له اقتصادي ستونزو او د وروستیو زلزلو له اغېزو سره مبارزه کوله.
جان ایلیف، په افغانستان کې د نړیوال د خوړو پروګرام مشر، ویلي چې هغه کورنۍ چې له مخکې له بېکارۍ او طبیعي زیانونو سره مخ وې، اوس په پوله مستقیم د جګړو تر اغېز لاندې دي او له سختې لوږې سره مخامخ دي. نوموړي ټینګار کړی چې د ناامنۍ زیاتېدل په دې سیمو کې بشري وضعیت لا پېچلی کړی دی.
نړیوال د خوړو پروګرام زیاته کړې چې سره له خطرناکې وضعې، د خپلو فعالیتونو ډېره برخه یې په پوله بېرته پيل کړې او پلان لري چې د خوړو او نغدي مرستې اړمنو کسانو ته په اتو ولایتونو کې ورسوي: نورستان، کنړ، ننګرهار، پکتیا، خوست، پکتیکا، زابل او کندهار. دا ولایتونه د هېواد په ختیځ او سوېل ختیځ کې موقعیت لري او په وروستیو میاشتو کې د ناامنۍ او بېځایه کېدو شاهدان وو.
دغه نړیواله اداره له نړیوالې ټولنې غوښتنه کوي چې د افغانستان د لوږې د بحران د پراختیا د مخنیوي لپاره بیړنۍ مرستې برابرې کړي. د نړیوال د خوړو پروګرام په وینا، هېواد د ۲۰۲۶ کال په پیل کې له دریو هممهالو کړکېچونو سره مخ دی: د افغانستان او پاکستان د پولې جګړې، د ایران د شخړو اغېزې، او د بېسابقې لوږې او خوارځواکۍ بیړنی وضعیت.
په خبرپاڼه کې همدارنګه ویل شوي چې د ایران له خوا پر ځینو خوراکي توکو او کرنیزو محصولاتو د وروستي صادراتو بندیز د افغانستان په بازارونو کې د بیو د لوړوالي لامل شوی دی. افغانستان چې د وارداتو پر سر متکي دی، د دغسې محدودیتونو پر وړاندې ډېر زیانپذیر دی او د سوداګریزو لارو هر ډول ګډوډي د کم عاید لرونکو کورنیو اقتصادي فشار لا زیاتوي.
په داسې حال کې چې د مرستو رسوونکي بنسټونه د کړکېچ د پراختیا خبرداری ورکوي، د طالبانو اداره تراوسه د پولي نښتو د انساني پایلو د مهار او د بېځایه شویو کورنیو د زیان مننې د کمولو لپاره هر اړخیز او واضح پلان نه دی وړاندې کړی، هغه موضوع چې د هېواد د بشري وضعیت د راتلونکې په اړه اندېښنې زیاتوي.
