د هوا پېژندنې ادارې خبرداری: په اوو ولایتونو کې د باران او واورې امکان
د طالبانو د ترانسپورت او هوايي چلند وزارت د هوا پېژندنې ریاست خبر ورکړی چې په اوو ولایتونو کې د باران او واورې اورېدو امکان شته. دغه پدیده کولای شي د یادو سیمو د اوسېدونکو ورځنی ژوند او تګ راتګ له ستونزو سره مخ کړي.
د دې ریاست د دوشنبې، د دلوې په ۶مه نېټه خپرې شوې خبرپاڼې له مخې، بدخشان، نورستان، کونړ، ننګرهار، لغمان، کاپیسا او پنجشیر هغه ولایتونه دي چې د باران او واورې اورېدو احتمال پکې شته او تمه ده چې ورښتونه له سبا څخه پیل شي.
په دغه اعلامیه کې ویل شوي چې د باران اندازه به په بېلابېلو سیمو کې له ۱۰ تر ۲۵ مليمتره وي او د واورې ضخامت به هم له ۱۰ تر ۲۵ سانتيمتره پورې ورسېږي. دا حالت په ځانګړې توګه د غرنیو سیمو د لارو د تړل کېدو خطر زیاتوي.
له دې سره هممهال، د طالبانو اداره وایي چې د وروستیو ورښتونو پر مهال په هېواد کې تر ۶۱ ډېرو کسانو خپل ژوند له لاسه ورکړی. دغه شمېرې یو ځل بیا د طبیعي پېښو پر وړاندې د نشتون، د بحران د مدیریت پر ضعف او د خلکو د خونديتوب پر اړه اندېښنې زیاتې کړي دي.
