واشنګټن او کاراکاس د ونزوئلا د ادارې پر سر په لفظي شخړه کې ښکېل شول
د واشنګټن او کاراکاس تر منځ د سیاسي ترینګلتیاوو په دوام کې، د امريکې د دفاع وزیر اعلان کړی چې د دغه هېواد اوسنی ولسمشر، دونالد ټرمپ، به د ونزوئلا د چارو د اداره کولو شرطونه ټاکي. دغه څرګندونې د ونزوئلا د موقتي ولسمشر له څرګند غبرګون سره مخ شوې دي.
پېټ هېګست، د امريکې د جګړې وزیر، د «سي بي اېس» له شبکې سره په مرکه کې وویل چې ټرمپ د ونزوئلا د راتلونکې په اړه په پرېکړو کې محوري رول لري، او د ده په وينا، امريکا به د دغه هېواد راتلونکې بدلونونه تر خپل کنټرول لاندې ولري. نوموړي پرته له دې چې د کوم هېواد نوم واخلي، دا هم زياته کړه چې هېڅ بهرنی ځواک به اجازه ونه لري په هغه نيمه کره کې چې امريکا پکې موقعيت لري، نفوذ ومومي.
هېګست د خپلو خبرو په بله برخه کې، د ټرمپ د ستاینې پر مهال ادعا وکړه چې د امريکې ولسمشر کولی شي د واشنګټن د راتلونکو کړنو لوری «تعیین» کړي. دغه دريځ د ناظرينو له لوري د امريکا د مداخلهګر سیاست څرګندونه بلل شوې ده.
خو د ونزوئلا موقتي ولسمشره، ډېلسي رودریګز، چې د نیکولاس مادورو واکمنۍ صلاحیتونه ور سپارل شوي، دا څرګندونې رد کړې او ټینګار يې وکړ چې ونزوئلا د هېڅ هېواد مستعمره نه ده او نه به شي. هغې وویل چې په کاراکاس کې د حکومت اداره پر خپل ځای ولاړه ده او چمتو ده چې د هر ډول ننګونې پر وړاندې د هېواد دفاع وکړي.
رودریګز زیاته کړه چې هېڅ ډول پوځی برید به د ونزوئلا خاوره ته اجازه ورنهکړل شي او هېواد به د خپلواکي او د راتلونکو نسلونو د راتلونکې ملاتړ وکړي. د هغې په وینا، د ونزوئلا خلک د بهرنیو فشارونو او لاسوهنو پر وړاندې مقاومت کړی او دا لاره به دوام ورکړي.
