د رمضان په مهال د پښتنو سیمو کې د تاوتریخوالي دوام
د روژې مبارک میاشتې له پیل سره هممهاله، راپورونه ښيي چې په یو شمېر پښتون مېشتو سیمو کې تاوتریخوالی لا هم روان دی؛ هغه پېښې چې د سیمهییزو سرچینو په وینا، د ملکي وګړو د تلفاتو سبب ګرځېدلې او د دې سیمو د اوسېدونکو اندېښنې یې زیاتې کړې دي.
منظور احمد پشتین، د پښتون ژغورنې غورځنګ بنسټ اېښودونکی او مشر، په خپل ایکس (پخوانی ټوېټر) پاڼه کې لیکلي چې د پاکستاني پوځ په عملیاتو کې د تيراه په سیمه کې څلور ملکي پښتانه وژل شوي او شپږ تنه نور ټپیان شوي دي. د هغه په وینا، له دې وروسته چې په اورکزو کې د دغو وژل شویو کسانو پر وړاندې د اعتراضونو غونډه وشوه، امنیتي ځواکونو له مظاهرهچیانو سره نښتې وکړې چې په ترڅ کې یې څلور نور کسان، چې د ده په وینا د «سولې او عدالت» لپاره راټول شوي وو، ټپیان شول.
پشتین همدارنګه ادعا کړې چې د افغانستان د میدان وردګ ولایت په بهسود ولسوالۍ کې د پاکستاني ځواکونو په هوایي بریدونو کې اووه لس ملکي کسان، چې ښځې او ماشومان هم پکې شامل دي، وژل شوي دي. یادې ولسوالۍ په تېرو کلونو کې هم د امنیتي پېښو شاهدې پاتې شوې ده.
هغه دغه پېښې «د نړېوالو قوانینو جدي سرغړونه» بللې او ویلي یې دي چې دا ډول واقعات د اغېزمنو ټولنو ترمنځ وېره او بېباوري نوره هم ژوره کوي.
د پښتون ژغورنې غورځنګ مشر په وینا، په وروستیو ورځو کې په ځینو نورو سیمو لکه رزماک، شوال په شمالي وزیرستان کې، د میرعلي مبارکشاهي کلي، سپینوام، اباخېل، دوسلي، تختخېل په لکي مروت کې، اعظم ورسک په جنوبي وزیرستان، باجوړ او بنو کې هم د امنیتي ځواکونو او وسلوالو ډلو ترمنځ نښتې شوي چې په پایله کې یې ملکي وګړي وژل شوي او ژوبل شوي دي.
پښتون ژغورنې غورځنګ، چې ځان یو مدني حرکت د پښتنو د حقونو د دفاع لپاره بولي، یو ځل بیا ټینګار کړی چې د دوی په وینا، د پښتنو پر ټولنو د «ناحقیو» پر وړاندې به ودریږي او د زیانمنو شویو خلکو ملاتړ ته به دوام ورکړي.
