نیویارک ټایمز: وینزویلا د خپلو تېلو وړونکو بېړیو د پوځي ساتنې هڅې کوي
یوې امریکايي رسنۍ راپور ورکړی چې د وینزویلا حکومت د خپلو تېلو د صادراتو پر وړاندې د زیاتو فشارونو په غبرګون کې هڅه کوي د تېلو وړونکو بېړیو د ساتنې تدابیر پیاوړي کړي.
د نیویارک ټایمز ورځپاڼې د راپور له مخې، چې د امریکا د لوري د اقداماتو د زیاتوالي یادونه يې کړې، نیکولاس مادورو، د وینزویلا ولسمشر، هڅه کوي د وضعیت د سم مدیریت او د نفتو د دوامدارې پلور لارې ومومي. د دې رسنۍ د معلوماتو له مخې، د خصوصي تېلو وړونکو بېړیو کارول د خام تېلو د فلوټینګ زیرمو په توګه د کاراکاس د حکومت له احتمالي انتخابونو څخه دي.
د نیویارک ټایمز د راپور پر بنسټ، او د باخبره سرچینو په حواله، د وینزویلا سمندري ځواک توپلرونکې کښتۍ هم د تېلو وړونکو بېړیو او د نفتو محصول وړونکو کښتيو د ساتنې لپاره ګمارل شوې دي. دا ګامونه د یوې پراخې برنامې برخه ده چې موخه یې د نفتو د صادراتو د سمندري لارو امنیت زیاتول دي.
ورځپاڼې زیاته کړې چې د وینزویلا د پوځیانو ځای پر ځای کول په هغو تېلو وړونکو بېړیو کې چې د چین پر لور روانې دي، د امریکا د ساحلي ساتونکي ځواکونو له خوا د دغو بېړیو د نیولو بهیر ستونزمن کولی شي، خو په عین حال کې د واشنګټن او کاراکاس تر منځ د پوځي شخړې خطر هم زیاتوي.
د راپور له مخې، متحده ایالاتو په تېرو دوو اونیو کې د وینزویلا د تېلو دوه بېړۍ نیولي او د درېیمې د نیولو هڅه يې هم روانه کړې ده. یو شمېر د نړیوالو قوانینو کارپوهان دا اقدامات د نړیوالو اصولو خلاف بولي او دا يې د سمندري غلا یوه بېلګه بللې ده.
