د وسلو د زېرمو د کمېدو اندېښنه؛ امريکا د پوځي تجهيزاتو توليد زياتوي
د امريکا د وسلو د زېرمو د کمېدو له راپورونو وروسته، د دغه هېواد ولسمشر ډونالډ ټرمپ ټاکل شوې ده د هېواد له سترو وسلو جوړوونکو شرکتونو له مشرانو سره وګوري څو د پوځي تجهيزاتو د توليد د زياتولو او چټکولو لارې وڅېړي. دا غونډه راتلونکې جمعه په سپينه ماڼه کې ترسره کېږي او تمرکز به يې پر هغو کمښتونو وي چې د وروستيو پېښو او نښتو وروسته رامنځته شوي دي.
د رويټرز خبري آژانس د باخبرو سرچينو له قوله راپور ورکړی چې په دې غونډه کې به د واشنګټن پر عاجلې اړتيا، يعنې د پوځي زېرمو د پياوړتيا، ټينګار وشي. د سرچينو په وينا، شرکتونه لکه «لاکهېډ مارتين»، «آر ټي ايکس» (د رېتون مور شرکت) او نور ستر دفاعي عرضه کوونکي دې غونډې ته بلل شوي دي.
د راپورونو له مخې، د امريکا حکومت هڅه کوي دغه شرکتونه دې ته وهڅوي چې د توليد ظرفيت په چټک ډول لوړ کړي. دا ګام په داسې حال کې اخيستل کېږي چې د تېر څو کلونو پرلهپسې جګړو او پراخې پوځي مصرف د هېواد پر دفاعي زېرمو فشار زیات کړی دی.
په ورته وخت کې، د امريکا د دفاع وزارت مرستيال سټيون فاينبرګ اعلان کړی چې پينټاګون د جګړو د مالي لګښتونو د جبران لپاره شاوخوا ۵۰ ميليارده ډالره اضافي بوديجې غوښتنه کړې ده. دا غوښتنه د امريکا د کلنۍ دفاعي بوديجې ترڅنګ وړاندې شوې چې د ۲۰۲۶ کال لپاره شاوخوا يو ټريليون ډالره اټکل شوې ده.
د «د نوي امنيت مرکز» په نوم څېړنيز بنسټ اټکل کړی چې د يوه هوايي بېړۍ الوتکهبره جګړهيي ډلې (لکه USS Gerald Ford) د ورځني عملياتو لګښت شاوخوا ۶.۵ ميليونه ډالره دی. برسېره پر دې، د تجهيزاتو د زيانونو مالي تاوان هم د پام وړ بلل شوی دی؛ راپورونه وايي چې د دوشنبې په ورځ لږ تر لږه درې امريکايي جنګي الوتکې په کوېت کې غورځېدلې دي.
د بريتانيا د ټايمز ورځپاڼې هم ليکلي چې روانې جګړې – که څه هم امريکا ستره دفاعي بوديجه لري – ډېرې لګښتوې ده، او د واشنګټن يو له مهمو اندېښنو څخه دا ده چې د لنډمهاله يا منځمهاله جګړو لپاره د کافي وسلو زېرمې ونه لري.
له هغه وخته چې د ۲۰۲۲ کال د روسيې او اوکراين جګړه پيل شوې او همدارنګه د اسرائيلو او غزې جګړه پيل شوې، متحده ايالاتو له خپلو پوځي زېرمو څخه ميلياردونه ډالره، په شمول د توپخانهيي سيستمونو، مهماتو او د ټانک ضد توغنديو، مصرف کړي دي؛ دا موضوع اوس د دغو زېرمو د چټک بيا رغونې بحث د هېواد د سياسي او پوځي مشرتابه په کچه يو لومړيتوب ګرځولی دی.
