امريکا د وېنزويلا په نږدې اوبو کې د چين يو تېللړونکې بېړۍ نيولې ده
د امريکايي رسنيو د راپور له مخې، متحده ايالاتو يوه لويه تېللړونکې بېړۍ د وېنزويلا له ساحلونو سره نژدې اوبو کې نيولې ده. د بلومبرګ د خبر له مخې، دغه بېړۍ د پاناما تر بيرغ لاندې تګ راتګ کاوه او ملکيت يې د يوې چينايي کمپنۍ و.
د الميادين ټلويزيون په وينا، بلومبرګ ليکلي چې دا بېړۍ د امريکا د سمندري عملياتو په ترڅ کې هدف ګرځېدلې او د دې جريان جزئيات د واشنګټن رسمي ادارو تصديق کړي دي.
په همدې حال کې، د امريکا د جګړې وزير پيت هيګست اعلان کړی چې د هغو تېللړونکو بېړيو د نيولو او محاصرې هڅې چې د وېنزويلا پر لور يا له هغه ځايه را روانېږي، به “په پوره توان” دوام وکړي. نوموړي زياته کړه چې پينټاګون د سمندري ساتونکې ځواک (ګارډ ساحلي) په مرسته د هغو شبکو پر ضد د څار عمليات پر مخ وړي چې امريکا يې جرمونه بولي.
د امريکا د کورنيو چارو وزيرې کريستي نوم هم تاييد کړې چې د دې هېواد سمندري ساتونکې ځواک د پينټاګون په ملاتړ، د شنبې په ورځ يوه تېللړونکې بېړۍ نيولې ده چې وروستی ځل يې د وېنزويلا په بندر کې تم شوې وه. نوموړې ادعا وکړه چې دا کړنې د بنديزمنو تېلو د قاچاق د مخنيوي په موخه ترسره کېږي.
دغه څرګندونې په داسې حال کې کېږي چې د وېنزويلا حکومت مخکې دا ډول اقدامات “سمندري غلا” بللي دي. همدارنګه، د رویټرز خبري اژانس د درو امريکايي چارواکو له قوله راپور ورکړی چې دا د بېړۍ نيونه د وېنزويلا سره نژدې نړيوالو اوبو کې شوې او مشري يې د امريکا د سمندري ساتونکې ځواک کړې ده.
دغه چارواکي، چې نه يې غوښتل نومونه يې څرګند شي، د عملياتو دقيق ځای نه دی افشا کړی، خو ټينګار يې کړی چې په دې سيمه کې د بنديزمنو بېړيو د څار او نيونې هڅې روانې دي.
