پخوانی سوری مفتی د جولاني د ډلې له خوا تر نیول کېدو وروسته شکنجه شوی
شیخ احمد بدرالدین حسون، چې پخوا د سوریې لوی مفتي و، څو میاشتې وړاندې د ابومحمد جولاني اړوند وسلهوالو ډلو لخوا ونیول شو، او اوس یې روغتیایي وضعیت د اندېښنې وړ بلل شوی دی. د ځایي سرچینو د راپور له مخې، نوموړی د سوریې دننه نامعلوم ځای ته انتقال شوی او رسنیو ته یې د وضعیت د معلومولو اجازه نه ده ورکړل شوې، چې دا چاره د هغه د برخلیک په اړه پوښتنې زیاتې کړې دي.
محمود موالدی، چې د سوریې د حزب التحریر الوطنی له مشرانو څخه دی، ویلي چې د شیخ حسون خراب روغتیایي حالت د نیونې پر مهال د جولاني د ځواکونو لخوا تر سره شویو شکنجو له امله دی. هغه زیاته کړې چې شیخ حسون اوس د امنیتي تدابیرو لاندې په یوه کور کې ساتل کېږي.
ابومحمد جولاني، چې ځان د «ولسمشر» په نوم يادوي، یوه تندلاره څېره ده چې نړیوال بندیزونه پرې لګېدلي، او د هغه تر مشرۍ لاندې ډله، هیئت تحریر الشام، د سوریې شمال کې پر ځینو سیمو واک لري. دا ډله له کلونو راهیسې د پراخو بشري حقونو د نقض له امله تورنه شوې ده.
سره له دې چې د شیخ حسون له نیول کېدو څو میاشتې تيرې شوې، تر اوسه پورې د هغه د دستګيرۍ لپاره هېڅ قانوني دلیل نه دی وړاندې شوی. نوموړی د پخواني سوری حکومت ديني رول درلود خو هېڅ اجرایي یا نظامي مقام یې نه درلود؛ دا مسئله په سوریه کې د غیردولتي وسلهوالو ډلو لخوا د دین او دیني شخصیتونو له سیاسي استفادې سره پر اندېښنو نور هم سیوری غوړولی دی.
