د قطر د مایع ګاز سترې فابریکې ته د توغندي برید
د «قطرانرژي» شرکت اعلان کړی چې د راس لفان صنعتي ښار باندې د توغندي برید له امله، چې د نړۍ تر ټولو لوی مایع طبیعي ګاز (LNG) تولیدي کمپلکس پکې موقعیت لري، د دغه ساحې ځینې برخې سوځېدلي او پراخ زیانونه یې لیدلي دي. د شرکت په وینا، یادې تاسیسات په مستقیم ډول په نښه شوي دي.
د خپرو شوو معلوماتو له مخې، دغه برید د صنعتي بنسټونو زیربناوو ته د پام وړ زیانونه اړولي دي. د انرژۍ د بازار ځینو کارپوهانو خبرداری ورکړی چې د دغسې پېښو دوام کیدای شي نړیوال اقتصادي اغېز ولري او د مایع طبیعي ګاز بیه په څرګند ډول لوړه کړي.
د قطر مایع طبیعي ګاز د اروپايي هېوادونو او د ختیځې آسیا د یو شمېر هېوادونو د انرژۍ د اړتیاوو مهمه برخه پوره کوي. د راس لفان له فابریکې څخه د تولید یا صادراتو هر ډول خنډ کولای شي د دغو سیمو د انرژۍ د تأمین زنځیر له ستونزو سره مخ کړي.
د قطر د بهرنیو چارو وزارت په یوه اعلامیه کې دغه برید غندلی او هغه یې د هېواد د حاکمیت سرغړونه بللې ده. دوحې ټینګار کړی چې د ځواب حق ځان ته محفوظ ګڼي. تر اوسه د زیانونو د کچې یا د تاسیساتو د وضعیت په اړه نور جزییات نه دي خپاره شوي.
