د امریکا استخباراتي چارواکی: طالبانو سره مشکوک کسان هېواد ته داخل شوي
د امریکا د ملي استخباراتو رییس خبرداری ورکړی چې یو شمېر داسې کسان چې د ترهګریزو فعالیتونو شک پرې کیږي، د امریکا خاورې ته داخل شوي دي، او د دوی د شالید ارزونې بهیر په تېرو څو کلونو کې له جدي نیمګړتیاوو سره مخ دی.
تولسي ګبرد، د فاکس نیوز له چینل سره په یوه مرکه کې ادعا وکړه چې په وروستیو کلونو کې نږدې ۱۸ زره داسې کسان چې د تروریزم له اړخه پېژندل شوي او یا شک پرې کېږي، امریکا ته د ننوتو اجازه ترلاسه کړې. نوموړې وویل، د جو بایډن اداره د دغو کسانو د شالید ارزونې پر مهال بېغوري کړې او ښايي لا هم یو شمېر نهشناخته کسان موجود وي.
ګبرد د امریکا د ملي ترهګرۍ ضد مرکز د معلوماتو په استناد وویل، له دغو کسانو نږدې دوه زره یې د افغانستان اتباع دي چې له ۲۰۲۱ کال کې د امریکايي ځواکونو د وتلو وروسته متحده ایالاتو ته داخل شوي. هغې وویل، د افشاکوونکو په وینا، د هماغه وخت د منل شوو کسانو ارزونه په ډېره بېړه او شتابزده توګه ترسره شوې وه او اړوند چارواکو ته ویل شوي وو چې د منلو بهیر چټک کړي.
یادې استخباراتي چارواکې د دغه وضعیت پایلې د امریکا د وګړو لپاره «ویرانکوونکې» وبللې، او هغې هغه ډزې یادې کړې چې د شکرانې ورځې څخه مخکې شوي وې او پکې د ملي ګارد دوه سرتیري په نښه شوي وو، چې یو تن یې ژوند له لاسه ورکړ. د دغې پېښې مشکوک عامل یو افغان وګړی پېژندل شوی.
پر همدې مهال، مخکیني رسمي راپورونه او ارزونې ښيي چې د امریکا له خوا له افغانستان څخه د وتلو بهیر له ساختاري محدودیتونو او چمتووالي له کمښت سره مل و. یو رسمي راپور چې د جو بایډن د ولسمشرۍ پر مهال خپور شوی، ښيي چې دغه اداره د هغه وتلو تړون تر اغېز لاندې وه، کوم چې د دونالد ټرمپ د ولسمشرۍ په پيل کې لاسلیک شوی و، او د ځواکونو او سیمهییزو همکارانو د ایستلو لپاره کافي پلان نه و تیار شوی.
همدارنګه، امریکايي رسنیو راپور ورکړی چې د ټرمپ ادارې څو کلنه موقع له لاسه ورکړه تر څو د افغانستاني همکارانو لپاره د ځانګړو مهاجرتي ویزو پروګرام پراخ کړي، او د دې دوسیو ارزونه یې سسته ساتلې وه. ډېری هغه افغان وګړي چې له ۲۰۲۱ کال وروسته امریکا ته داخل شوي، له امریکایي ځواکونو سره یې همکاري کړې وه او له افغانستان کې د غچ اخیستنې وېره یې لرله.
سره له دې چې له وروستیو ډزو وروسته سیاسي ژبه تون شوې، خو امریکايي چارواکو او ټولنیزو مشرانو ټینګار کړی چې د امریکا کې مېشتو افغانانو اکثریت ته د خطر په سترګه نه کتل کېږي او ډېری یې د قانونپالو اوسېدونکو په توګه پېژندل کېږي.
په یوه جلا پېښه کې، د امریکا د رود آیلند ایالت چارواکي د پراخو ډزو ارزونه کوي چې د پرووېډنس ښار کې د براون پوهنتون سره نږدې شوې، چې پکې لږ تر لږه دوه کسان وژل شوي او یو شمېر نور ټپیان شوي دي. دا پېښه د شنبې په ورځ د ماسپښین تر څلورو بجو وروسته شوې او د محلي پولیسو، ایالتي چارواکو او فدرالي ادارو په ګډون د افبيآی کارکوونکي هم سیمې ته ورغلي.
د پرووېنس ښاروال ویلي چې اووه تنه ټپیان په باثبات حالت کې روغتون ته لېږدول شوي، یو تن په خراب خو ثبات لرونکي وضعیت کې دی، او یو بل کس روغتون څخه رخصت شوی دی. د پېښې یو شکمن کس د یکشنبې په ورځ نیول شوی، او پلټنې لاهم دوام لري.
