د امريکا هوايي بريدونه پر کاراکاس، د ونزویلا پلازمېنه، ترسره شوي
د بېلابېلو خبري سرچینو د راپورونو له مخې، د ونزویلا پلازمېنه کاراکاس نن سهار د سختو چاودنو شاهد وه. د چاودنو له امله له ښار څخه لوګي پورته شوي، جنګي الوتکې او چورلکې په فضا کې الوتنې کړې او په ځینو سیمو کې برېښنا او انټرنېټ پرې شوي دي. د ونزویلا د رسنیو او نړیوالو شبکو د راپورونو له مخې، ګڼ شمېر مهم مرکزونه، په شمول د پوځي اډو، یو بندر، «ایګروتي» هوايي ډګر او د «فورت تیونا» پوځي کمپلکس چې د دفاع وزارت ودانۍ پکې موقعیت لري، د هوايي بریدونو هدف ګرځېدلي دي. همدارنګه، ویل شوي چې لږ تر لږه اووه تر اته چاودنې په بېلابېلو برخو کې اورېدلې شوې دي. د المیادین د شبکې خبریال راپور ورکړی چې بریدونه یوازې په کاراکاس پورې محدود نه دي او د هوايي ډګر څنګ ته د لاګوئرا سیمه او ځینې ساحلي سیمې هم په نښه شوې دي. د هغه په وینا، د بریدونو شدت د برېښنا او انټرنېټ د پرېکېدو لامل شوی او جنګي الوتکې لا هم په ټیټه ارتفاع کې پرواز کوي. د دغو پېښو په غبرګون کې، د ونزویلا د بهرنیو چارو وزیر دغه بریدونه د ملګرو ملتونو د منشور ښکاره سرغړونه بللې او متحده ایالات یې اصلي عامل ګڼلی دی. نوموړي ټینګار کړی چې هر ډول هڅه د ونزویلا د سیاسي نظام د بدلون لپاره به ناکامه شي. په ورته وخت کې، د «فاکس نیوز» خبریال د امریکا د دولتي چارواکو په حواله راپور ورکړی چې د متحده ایالاتو د پوځ بریدونه پر ونزویلا روان دي. د «راشا تودې»، «رویټرز» او «اسوشیتدپرس» په څېر رسنیو خبر ورکړی چې د کاراکاس فضا د جنګي الوتکو او چورلکو له حرکتونو ډکه ده او د پوځي اډو شاوخوا برېښنا پرې شوې ده. د کولمبیا ولسمشر، گوستاوو پېترو، د کاراکاس د هدف ګرځېدو تائید کړی او له ملګرو ملتونو او د امریکا د هېوادونو له سازمانه یې د بیړنۍ غونډې غوښتنه کړې ده. دغه پرمختګونه په داسې حال کې رامنځته کېږي چې د تېرې یوې اونۍ په ترڅ کې د امریکا پوځي حضور د ونزویلا ساحلونو ته نږدې زیات شوی و.
