یونیسف او یونسکو: د افغانستان د زدهکړې بحران ژور شوی دی
په نړيوال د زدهکړې د ورځې سره په يو وخت، د ملګرو ملتونو د ماشومانو د ملاتړ صندوق (یونیسف) او د ملګرو ملتونو د ښوونيز، ساینسي او فرهنګي سازمان (یونسکو) اعلان کړی چې د افغانستان د زدهکړې حالت د اندېښې وړ مرحلې ته رسېدلی او د زدهکړې بحران په پراخه کچه روان دی.
دغو دوو بنسټونو د شنبې په ورځ (د دلوې ۴مه) په يوه ګډه اعلاميه کې ويلي، ۹۳ سلنه افغان ماشومان د لومړني ښوونځي د پای ته رسېدو پر مهال د لوستلو کافي مهارت نه ترلاسه کوي؛ دا موضوع د هېواد د ښوونې سیسټم د ژور ضعف او د زدهکړې د ټيټې کچې ښکارندويي کوي.
په اعلاميه کې همدارنګه راغلي چې شاوخوا ۲.۲ ميليونه تنکۍ نجونې له ښوونځي تګ بېبرخې شوې دي؛ دا محروميت د طالبانو تر واک لاندې لا پسې زيات شوی او د نجونو د منځنۍ او لوړې زدهکړې لاسرسی په سیستماتیک ډول محدود شوی دی.
نړیوالو تعلیمي بنسټونو ټینګار کړی چې د دې وضعیت دوام د افغانستان د ځوان نسل راتلونکی له جدي خطر سره مخ کوي او له د طالبانو ادارې یې غوښتي چې پر زدهکړې، په ځانګړي ډول د نجونو پر زدهکړې لګول شوي محدودیتونه لېرې کړي او ټولو ماشومانو ته د باکیفیته زدهکړې د برابر لاسرسي زمینه برابره کړي.
