یونیسف: په ۲۰۲۶ کال کې له ۲۲ میلیونو زیات افغانان بشري مرستو ته اړتیا لري
د ملګرو ملتونو د ماشومانو ملاتړ ادارې (یونیسف) ویلي چې د افغانستان بشري اړتیاوې به د ۲۰۲۶ کال تر پایه لا زیاتې شي او نږدې ۲۲ میلیونه افغان وګړي به جدي ډول نړیوالو بشري مرستو ته اړتیا ولري.
په دې ادارې تازه راپور کې، چې «د ماشومانو لپاره بشردوستانه اقدام په ۲۰۲۶ کال کې» تر سرلیک لاندې خپور شوی، ویل شوي چې په افغانستان کې هممهاله بېلابېلو بحرانونو، لکه پراخ فقر، اساسي خدمتونو کمښت او د مؤثر ملاتړ سیستم نه شتون، د میلیونونو کورنیو ژوند سخت ګواښلی دی.
یونیسف ټینګار کړی چې اقتصادي بحران دوام، د ټولنیز او کاري ژوند پراخ محدودیتونه، او د طالبانو د ادارې لخوا د خلکو اړتیاوو ته کم پام، د خدماتو او حمایتي جوړښتونو لا ډېر ضعف ته لاره هواره کړې ده. په راپور کې ویل شوي چې ماشومان او ښځې د اوسني حالت تر ټولو زیانمن قشرونه دي.
یادې ادارې له نړیوالې ټولنې غوښتي چې د فقر او خوارځواکي د پراخیدو د مخنیوي لپاره خپلې مالي او بشري مرستې له افغانانو سره زیاتې کړي. یونیسف خبرداری ورکړی چې که د مرسته کوونکو هېوادونو همکاري نه وي، میلیونونه ماشومان به له لوږې، ناروغیو او د زده کړو له حقه بې برخې شي.
کارپوهان وايي چې د طالبانو ادارې محدودوونکې پالیسۍ، په ځانګړي ډول د نجونو زده کړو او د ښځو کار ته د محدودیتونو له کبله، د اوسني بشري بحران د ژورېدو لوی لامل دی. دوی وايي چې د دې وضعیت له پامه غورځول ښایي د افغانستان لپاره اوږدمهاله او نه جبرانېدونکي زیانونه ولري.
