یونیسف د افغانستان یوې نجلۍ انځور د ۲۰۲۵ کال د کال انځور اعلان کړ
د ملګرو ملتونو د ماشومانو د ملاتړ صندوق (یونیسف) اعلان کړی چې د یوه افغانې نجلۍ انځور چې د زدهکړې په حال کې دی، د ۲۰۲۵ کال د کال انځور په توګه ټاکل شوی دی. دا انځور د افغانستان ختیځ کې، د ننګرهار ولایت یوې لرې پرتې کلیوالې سیمې کې اخیستل شوی او د نجونو د زدهکړې وضعیت ته یې د نړۍ پام را اړولی دی.
د یونیسف په وینا، دغه انځور د فرانسوی خبریالې عکاس الیس بلانشارد لهخوا اخیستل شوی او یوه نجلۍ په نوم حاجره انځوروي چې د محدودیتونو سره سره خپلې زدهکړې ته دوام ورکوي. دغه اداره ټینګار کړی چې یاد انځور د میلیونونو افغان نجونو د چوپ خو دوامدار مقاومت نښه ده.
د یونیسف مشره، الیز بودنبندر، د جمعې په ورځ (د دسمبر ۱۹مه) ویلي چې د افغانستان ډېرو نجونو ته ماشومتوب د زدهکړې د لاسرسي لپاره د مبارزې معنا لري، هغه زدهکړه چې د دوی بنسټیز حق ګڼل کېږي. هغې زیاته کړې چې د زدهکړې محرومیت د راتلونکو نسلونو راتلونکی له ګواښ سره مخ کوي.
له هغه وروسته چې د طالبانو اداره په ۲۰۲۱ کال کې بېرته واک ته ورسېده، د نجونو پر زدهکړو پراخ محدودیتونه ولګېدل؛ لومړی د شپږم ټولګي څخه پورته زدهکړې بندې شوې او وروسته د لوړو او نیمه لوړو زدهکړو دروازې هم وتړل شوې. د کورنیو او نړیوالو فشارونو سره سره، د طالبانو اداره تر اوسه د دغو پالیسیو د بیاکتنې کوم ښکاره نښه نه ده ښودلې، هغه وضعیت چې لا هم د بشري حقونو او تعلیمي بنسټونو له خوا تر نیوکې لاندې دی.
