د ملګرو ملتونو راپور: شاوخوا دوه نيم ميليونه افغانان هېواد ته ستانه شوي
د ملګرو ملتونو د کډوالو عالي کمېشنرۍ (UNHCR) په خپل تازه راپور کې ويلي، له ۲۰۲۵ کال له پيله نږدې دوه نيم ميليونه د افغانستان اتباع له ګاونډيو هېوادونو هېواد ته راستانه شوي دي. دغه ستنېدنه د افغانستان د عامه خدماتو پر کمزورو بنسټونو نوي فشارونه اچولي دي.
د راپور له مخې، UNHCR د درې ميليونه ډالرو مالي مرستې په کارولو او د افغانستان له بشرپال اماني صندوق، اسلامي پرمختيايي بانک او د «پولیو د ميراث د ننګونې» له پروګرام سره په همکارۍ، د بېرته ستنېدونکو د عاجلو روغتيايي اړتياوو د پوره کولو لپاره هڅې پيل کړي دي. دا پروګرامونه هغو ټولنو ته ځانګړې پاملرنه کوي چې د سختو او کړکېچنو شرايطو تر لاندې ژوند کوي.
د دې بشردوستانه نوښت په چوکاټ کې ټاکل شوې چې په راتلونکو دوو کلونو کې په بېلابېلو سيمو کې درې عصري او بشپړې روغتيايي کلينيکونه جوړ شي. د دې پروژې موخه دا ده چې د کورنيو بېځايه شويو او بېرته ستنېدونکو خلکو لپاره په هغو سيمو کې د اساسي روغتيايي خدمتونو لاسرسی ښه شي چې تر ټولو زيات زيانمنې شوې دي.
د بېرته ستنېدونکو د نوې څپې د زياتوالي خبر په داسې حال کې ورکول کېږي چې د بشري مرستو بنسټونو څو ځله د روغتيايي خدماتو د محدود ظرفيت او د مديريت د کمزورۍ په اړه اندېښنه څرګنده کړې ده؛ يو حالت چې د طالبانو د واکمنۍ لاندې د خلکو، په ځانګړي ډول د زيانمنو قشرونو، د بنسټيزو اړتياوو د پوره کولو لپاره جدي ننګونې راولاړې کړي دي.
