ملګرو ملتونو: ډېری د کورنیو ښځینه سرپرستان له بنسټیزو اړتیاوو بېبرخې دي
د ملګرو ملتونو د پرمختیايي پروګرام (UNDP) ویلي، ۸۸ سلنه هغه ښځې چې د خپلو کورنیو د ملاتړ مسؤلیت لري، له بنسټیزو اړتیاوو لکه معیشت او خوړو محرومې دي؛ یو حالت چې د ټولنې پر خورا زیانمن قشر اقتصادي فشار زیات کړی دی.
د دغه راپور له مخې، یوازې ۷ سلنه د کورنیو ښځینه سرپرستانو وتوانېدې چې له کوره بهر په کار بوختې شي؛ یو شمېر چې د ښځو لپاره د کاري فرصتونو سخت محدودیت ښيي. هممهاله، دغه اداره زیاته کړې چې په ټوله کې ۷۵ سلنه د هېواد وګړي له اقتصادي ناامنۍ سره مخ دي.
د ملګرو ملتونو د پرمختیايي پروګرام په خبره، د دې وضعیت د حل په موخه، اروپايي اتحادیه یو پروژه تمویلوي چې له لارې به یې د ښځو تر مشرۍ لاندې کاروبارونو ته مالي ملاتړ برابر شي څو ښځې اقتصادي توان ترلاسه کړي. خو د طالبانو د پراخو محدودیتونو دوام د ښځو پر کار او ټولنیز حضور، د دغو پروژو اغېزمنه پلي کېدل له جدي ننګونو سره مخ کړي دي.
له بلې خوا، د ملګرو ملتونو د بشردوستانه مرستو د همغږۍ دفتر «اوچا» مخکې خبرداری ورکړی و چې افغانستان به تر ۲۰۲۶ کال پورې هم د نړۍ له تر ټولو ستر بشري کړکېچونو څخه پاتې شي. په راپور کې راغلي، کلونو جګړو، اقتصادي کمزورتیا او د اساسي خدماتو په برخه کې د پانګونې کموالی د ګڼو خلکو د زغملو وړتیا کمزورې کړې ده.
د «اوچا» موندنو ښودلې چې دغه فشارونه اوس د خوړو ناامنۍ، له پولو د کډوالو پراخ ستنېدو، د اقلیمي بدلونونو له امله وچکالۍ، طبیعي پېښو او د ښځو او نجونو له عامه ژوند څخه منظمې محرومۍ له امله نوره هم زیات شوي دي. د دغه اټکل پر بنسټ، په ۲۰۲۶ کال کې شاوخوا ۲۱.۹ میلیونه تنه، چې د افغانستان ۴۵ سلنه وګړي جوړوي، له بشري مرستو سره ته اړتیا لري.
