په بدخشان کې څلور د اوبو لګولو کانالونه بېرته جوړ شول
د ملګرو ملتونو د نشهيي توکو او جرمونو پر ضد دفتر، د جاپان د نړیوالې همکارۍ ادارې (جایکا) په همکارۍ، د بدخشان ولایت د ارګو، خش او کشم ولسوالیو کې څلور ستر د اوبو لګولو کانالونه بازسازي کړي دي. دا پروژه له زرو زیاتو هغو کروندګرو کورنیو ته چې پخوا یې کوکنار کرل، دايمي د اوبو لاسرسی برابر کړی او د مشروعو کرو لړ کې د حاصل لوړوالي او زیاتوالي زمينه یې برابره کړې ده.
د دې کانالونو د منظمې اوبۀ رسونې له لارې، د یادو سیمو اوسېدونکي اوس کولای شي چې قانوني زراعتي تولیدات پراخ کړي او خپل د خوړو امنیت پیاوړی کړي. دا ګام د کوکنارو پر ځای د پایدارو بدیلو رامنځته کولو لپاره د هڅو یوه برخه بلل کېږي.
په زیان منونکو سیمو کې د مناسبې اوبۀ لګولو د زیربناوو کمښت تل د قانوني کرنې پر وړاندې ستر خنډ ګڼل شوی. د کارپوهانو په باور، د نړیوالې ټولنې او اړوند ادارو پاملرنه ضروري ده، څو د نشهيي توکو پر ځای ریښتینی بدیل رامنځته شي او کروندګرو ته د دوامدار ژوند تضمین وشي.
