ملګري ملتونه: د افغانستان د ښځو اقتصاد په نازک حالت کې دی
د ملګرو ملتونو د پرمختیا پروګرام (UNDP) خبرداری ورکړی چې د افغانستان د ښځو اقتصادي وضعیت ډېر نازک دی او د هغوی لاسرسی د کار فرصتونو او مالي سرچینو ته لا هم محدود پاتې شوی دی.
په رپوټ کې چې یادې ادارې د سهشنبې په ورځ، د دلوې ۲۱مه خپور کړی، راغلي چې ۷۵ سلنه د افغانستان اوسېدونکي له ورځنیو اړتیاوو د امنیت له نشتوالي سره مخ دي او ۸۸ سلنه ښځهمشرتابه کورنۍ د ژوند بنسټیزو اړتیاوو ته لاسرسی نه لري. دغه شمېرې د اقتصادي پراخ فشار څرګندونه کوي، په ځانګړي توګه پر زیانمنو قشرونو او ښځو.
د رپوټ له مخې، یوازې ۷ سلنه ښځې له کوره بهر کار کوي، په داسې حال کې چې د نارینهوو د کار کچه ۸۴ سلنې ته رسېږي. د ملګرو ملتونو اړوند ادارو ټینګار کړی چې پر ښځو د کار او ټولنیز حضور پراخې محدودې، چې د طالبانو د واکمنۍ له پیل وروسته زیاتې شوې دي، د هغوی پر اقتصادي خپلواکۍ مستقیم منفي اغېز کړی دی.
د نړېوال خوراکي پروګرام (WFP) هم ویلي چې د ۲۰۲۴ کال ترمخه یوازې ۱۱.۸ سلنه بالغانو په افغانستان کې بانکي حساب درلود، او د ښځو تر مشرتابه لاندې د کوچنیو او منځنیو کاروبارونو لپاره د رسمي پورونو او مالي ملاتړ لاسرسی ډېر محدود و، یو حالت چې د محلي اقتصادي فعالیتونو د ودې مخه نیسي.
د ملګرو ملتونو په وینا، د دغو شرایطو په غبرګون کې د اروپایي ټولنې لهخوا یو پروژه د ۲۰۲۴ تر ۲۰۲۵ کلونو لپاره تمویل شوې، چې په شپږ ولایتونو کې پلي شوې ده. دغه پروګرام ښځو ته عملي اقتصادي لارې چارې برابروي، د هغوی لاسرسی مالي خدمتونو ته زیاتوي او د کوچنیو او منځنیو کاروبارونو د ودې لپاره د مالي مرستو له لارې ملاتړ کوي.
