ملګرو ملتونو په افغانستان کې د څښاک د اوبو د کمښت په اړه خبرداری ورکړی
د ملګرو ملتونو د بشري استوګنې پروګرام (UN-Habitat) ويلي، په افغانستان کې د پاکو څښاک اوبو او د حفظالصحې خدماتو نشتوالی لا هم د خلکو د ورځني ژوند له جدي ننګونو څخه دی.
د دې ادارې په وینا، اوبه يوازې يو لومړنی اړتيا نه ده، بلکې د انساني کرامت، عامې روغتيا او د خلکو د ژوند دوام سره مستقيم تړاو لري. له دې سره، د هېواد ګڼ شمېر اوسېدونکي، په ځانګړي ډول هغه کسان چې په غيررسمي يا بېنظمې سيمو کې ژوند کوي، له دې بنسټيز حق څخه محروم پاتې دي.
UN-Habitat ټينګار کړی چې د دوامدارو زيربناوو نشتوالی د اوبو او حفظالصحې په برخه کې د کورنيو لپاره جدي روغتيايي او ټولنيزې پايلې لري، او تر ټولو ډېر زيان يې ماشومان او ښځې ويني.
يادې ادارې غوښتنه کړې چې د افغانستان ټولو اوسېدونکو ته د پاکو اوبو او حفظالصحې خدماتو د برابرولو لپاره همغږي هڅې زياتې شي. دا موضوع د اغېزمن پلان جوړونې او د طالبانو د ادارې د حسابورکونې نشتون له امله، لا هم د افغان اتباعو او بشري سازمانونو يو مهم غوښتنلیک پاتې شوی دی.
