ملګري ملتونه: په افغانستان کې د ښاري پلان نشتون د بېوزلۍ او شخړو لامل شوی
په افغانستان کې د ملګرو ملتونو د بشري استوګنې اداره (یونهبیتات) د ښاري مدیریت او پلان جوړونې د نشتوالي په تړاو اندېښنه ښودلې او خبرداری یې ورکړی چې له امله یې د هېواد په اطرافو کې ناسم شهرې پراخوالی او غیري رسمي مېشت ځایونه رامنځته شوي دي.
یادې ادارې د سه شنبې په ورځ، د لړم په شلمه، په خپره شوې اعلامیه کې ویلي، چې په هېواد کې د روښانه ښاري پرمختیا د چوکاټ نشتوالی نه یوازې اقتصادي او ټولنیزې ستونزې زیاتوي، بلکې د ښاري بېوزلۍ د ډېرېدو او د کوربه ټولنو او بېځایه شوو ترمنځ د شخړو ښکارندويي کوي.
یونهبیتات ټینګار کړی، چې د ښاري بنسټونو او اساسي خدماتو په وړاندې کولو کې هدفمندې پانګونې کولی شي له بېځایه شوو سره د ښارونو په پرمختیا کې د رغنده ونډې اخېستو زمینه مساعده کړي.
یادې ادارې له ټولو اړخونو غوښتنه کړې چې د نفوسو د بدلونونو په پام کې نیولو سره، د متوازن ښاري پرمختګ لپاره مناسب پلانونه ترتیب کړي.
یاد خبرداری پر داسې مهال خپرېږي، چې د طالبانو اداره، د نامشروع جوړښت په توګه، تر اوسه د ښاري پراختیا لپاره هېڅ اوږدمهاله برنامه نه ده وړاندې کړې. طالبانو زیات تمرکز پر واک ټینګ ساتلو کړی؛ داسې حال کې چې د هېواد اقتصادي بیا رغونې او پایدارې ښاري پراختیا ته هیڅ پام نه دی شوی.
