د ملګرو ملتونو استازي د کابل پر هوايي برید د بیړني څېړنو غوښتنه وکړه
ریچارد بنت، د افغانستان لپاره د ملګرو ملتونو ځانګړي راپور ورکوونکي، د پاکستان له خوا پر کابل د هوايي برید په غبرګون کې له بیړنیو، خپلواکو او شفافو څېړنو غوښتنه کړې ده. نوموړي ټینګار کړی چې دا پېښه باید په جدي توګه وڅېړل شي او د برید عاملان باید حساب ورکړي.
بنت په خپله د اکس په پاڼه کې لیکلي چې د راپورونو له مخې، دې برید د هغو کسانو د درملنې مرکز په نښه کړی چې د نشه يي توکو له اعتیاد سره مخ دي، او له دې امله لسګونه کسان وژل شوي او ټپیان دي. د هغه په وینا، پر یو درملنیز مرکز برید د نړيوال بشردوستانه قانون د اصولو د پلي کېدو په اړه جدي اندېښنې راولاړوي.
د ملګرو ملتونو ځانګړي راپور ورکوونکي همدارنګه څرګنده کړې چې د دې پېښې مسئولین باید محاکمه شي او د قربانیانو کورنیو ته غرامت ورکړل شي. هغه د څېړنې د بهیر د شفافیت او د خلکو د لاسرسي اړتیا باندې هم ټینګار کړی دی.
