د ملګرو ملتونو د کارپوهانو اندېښنه له دې امله چې ښځې د دې ادارې دفترونو ته د تګ اجازه نه لري
یو شمېر د ملګرو ملتونو کارپوهانو ویلي چې د افغانستان ښځې، په ځانګړي ډول د دې ادارې داخلي کارکوونکې، قراردادي کارکوونکي او مراجعين، لاهم د ملګرو ملتونو دفترونو ته د داخلېدو څخه منع شوي دي. د دوی په وینا، دا کار د بشري مرستو د رسولو بهیر له جدي خنډونو سره مخ کړی دی.
کارپوهانو ټینګار کړی چې د افغانستان په ټولنه کې د ډېرو خدمتونو وړاندې کول، په ځانګړې توګه د روغتیا، د مرستو د وېش او ټولنیزو ملاتړونو په برخو کې، د ښځو د مستقیم ګډون اړتیا لري څو د ښځو اړوند چارو ته رسېدنه وشي. د دوی په باور، د ښځینه کارکوونکو نشتوالی د ځینو ژوندیو چارو په ترسره کېدو منفي اغېز وکړی، په ځانګړي ډول د طبیعي پېښو په ځواب او د ملاتړ پروګرامونو په تطبیق کې.
په د کارپوهانو په اعلامیه کې راغلي چې دا ډول محدودیتونه نه یوازې د ښځو د کار او مسلکي حضور حق تر پښو لاندې کوي، بلکې د هغو ښځو او نجونو ژوند هم زیانمنوي چې پر دغو خدمتونو تکیه لري. دوی خبرداری ورکړی چې ښځې او نجونې د دې محدودیتونو ډېرې اغېزې زغمي.
د ملګرو ملتونو کارپوهانو له دغې ادارې غوښتنه کړې چې په ګډ او یو موټي دریځ سره د افغان ښځو لپاره د خوندي او مناسب کاري شرایطو د برابرولو لپاره اقدام وکړي. د دوی په وینا، د افغانستان ښځې د پراخو ننګونو سره سره لاهم د خپلو ټولنو په خدمت کې فعال رول لري او اړتیا لري چې د تبعیض او خطر پرته چاپېریال کې خپلې چارې ته دوام ورکړي.
خو د طالبانو اداره تراوسه د ملګرو ملتونو د کارپوهانو د اندېښنو او غوښتنو په اړه هېڅ غبرګون نه دی ښودلی. دا وضعیت په داسې حال کې دوام لري چې پر د افغان ښځو د کار او ټولنیز حضور لګول شوي بندیزونه څو ځل د بشري حقونو مدافعانو او نړیوالو بنسټونو له سختو نیوکو سره مخ شوي او د بشري مرستو د مؤثرې رسونې پر وړاندې یو له اساسي خنډونو بلل شوي دي.
