د ملګرو ملتونو د استازي غوښتنه: په ايران کې د دوو پخوانيو افغان پوځیانو د وژنې خپلواکه څېړنه دې وشي
ريچارډ بېنټ، د افغانستان د بشري حقونو لپاره د ملګرو ملتونو ځانګړي راپور ورکونکي، د دوشنبې په ورځ غوښتنه وکړه چې د اکرامالدين سريع او محمد امين الماس، دوو پخوانیو افغان پوځیانو، د وژل کېدو په اړه دې يوه خپلواکه او شفافه څېړنه ترسره شي. هغه ټينګار وکړ چې د دې پېښې عاملان بايد وپېژندل شي او عدالت ته وړاندې کړای شي.
ښاغلي بېنټ د دې پېښې له امله د ژورې اندېښنې څرګندونه وکړه او په «اېکس» ټولنيز شبکه کې يې وليکل، چې دغه وژنې بايد په خپلواکه توګه وپلټل شي او عاملان يې د قانون منګولو ته وسپارل شي. نوموړي پرته له دې چې ډېر جزئيات ورکړي، د حساب ورکونې او د ورته پېښو د تکرار د مخنيوي پر اړتيا ټينګار وکړ.
په همدې حال کې، د افغانستان د ډيپلوماټيکو او قونسلګري استازوليو د همغږۍ شورا هم په يوه اعلاميه کې ويلي، چې د افغانستان د پخوانيو امنيتي ځواکونو پر غړو هدفمند بريدونه زيات شوي او دا بهير د اندېښنې وړ دی. شورا خبرداری ورکړی، چې د دغو پېښو دوام به د پخوانيو پوځیانو امنيتي او رواني حالت لا نور هم شکنند کړي.
اکرامالدين سريع د پخواني حکومت پر مهال په نورستان، بغلان او تخار ولايتونو کې د پوليسو قوماندان پاتې شوی و، او تر د رژيم تر سقوط لږ مخکې پورې په خپل وروستي دنده کې پاتې و. هغه وروسته له افغانستان وتلی او ايران ته تللی و. د ده د نږدې کسانو په وينا، نوموړی هلته د يو شمېر پخوانيو امنيتي سرتېرو سره د اسنادو او استوګنې په چارو کې مرسته کوله.
په داسې حال کې چې ډېر پخواني پوځيان د طالبانو تر واکمنۍ وروسته له ګواښونو، محدوديتونو او ناامنۍ سره مخ دي، منتقدان وايي چې د دغو کسانو د خوندیتوب لپاره د عملي ضمانتونو نشتوالی هغوی د هېواد دننه او بهر له خطر سره مخ کړی دی. دا موضوع يو ځل بيا د طالبانو د چلند او مسؤليت په اړه پوښتنې راپورته کړې دي.
له بلې خوا، د ايران د بهرنيو چارو وزارت د دوشنبې په ورځ اعلان وکړ، چې د يادې پېښې په تړاو څېړنې دوام لري او پايلې به يې په مناسب وخت کې اعلان شي.
