ملګرو ملتونو د افغانستان لپاره پر قوي همغږي او دوامدار ملاتړ ټینګار وکړ

اندریکا راتواټه، چې په افغانستان کې د ملګرو ملتونو د ځانګړي استازي دفتر مرستیاله او همغږونکې ده، ویلي چې د ملګرو ملتونو له سرمنشي سره یې د افغانستان د روان وضعیت په اړه خبرې کړې دي.

راتواټه ټینګار وکړ چې د افغانستان د خلکو زغم د ملګرو ملتونو د کار په محور کې دی، او د خلکو د مؤثر ملاتړ لپاره، د ملګرو ملتونو تر چتر لاندې بنسټونو ترمنځ قوي همغږي او له مرسته کوونکو ادارو څخه دوامدار او د باور وړ ملاتړ ته اړتیا ده.

هغې زیاته کړه چې دا ډول همغږي کولی شي له اوسنیو ننګونو سره د محلي ټولنو د مقاومت بنسټ برابر کړي.

د نړیوالو چارو کارپوهان وایي، په داسې حال کې چې د طالبانو اداره په ځینو سیمو کې مرستندویه بنسټونو ته د آزاد لاسرسي مخه نیولې، د مرستو د همغږي او څارنې په برخه کې د ملګرو ملتونو رول تر بل هر وخت مهم شوی دی.