د ترکي پانګهوالو د هرات صنعتي ښارګوټي کې د پانګونې لېوالتیا څرګنده کړه
يو شمېر ترکي پانګهوالو او سوداګرو د هرات له والي نوراحمد اسلامجار سره په ليدنه کې د دې ولايت په صنعتي ښارګوټي کې د پانګونې د پيلولو پر لېوالتيا ټينګار وکړ او له محلي ادارې يې د همکارۍ غوښتنه وکړه.
د ورکړل شوو معلوماتو له مخې، دغو پانګهوالو وويل چې د خپلو اقتصادي طرحو د عملي کولو لپاره، د اداري، زيربنايي او حقوقي اسانتياوو برابرول له محلي ادارې سره بنسټيز ارزښت لري، او که دا سهولتونه چمتو نه شي، د پانګې جلب به له ستونزو سره مخ شي.
نوراحمد اسلامجار د دې علاقې هرکلی وکړ او ويې ويل چې د هرات محلي اداره له کورنيو او بهرنيو پانګونو ملاتړ کوي، او ژمنه يې وکړه چې په صنعتي ښارګوټي کې به اړينې اسانتياوې پانګهوالو ته برابرې کړي.
د هرات والي زياته کړه چې د امنيت تامين، اداري شفافيت او له پانګهوالو سره دوامداره همکاري د طالبانو د واکمنۍ د ادارې له لومړيتوبونو څخه دي. خو اقتصادي کارپوهان بيا ټينګار کوي چې د دغو ژمنو عملي کېدل، په ځانګړي ډول د اوسني حالت په پام کې، روڼو تضمينونو، د مقرراتو ثبات او د کورنيو او بهرنيو پانګهوالو د اعتماد رامنځته کولو ته اړتيا لري.
