ټرمپ: د ایران جګړه نږدې پای ته رسېږي، امریکا به ژر خپل ځواکونه وباسي
د امريکا ولسمشر ډونالډ ټرمپ اعلان کړی چې هېواد يې د ايران پر وړاندې جګړه کې ټولو ټاکل شويو اهدافو ته رسېدلی او پوځي عمليات به ډېر ژر پای ته ورسېږي. نوموړي ويلي چې د امريکا ځواکونه ښايي د دوو تر دريو اوونيو په موده کې له ايران څخه ووځي.
ټرمپ همداراز څرګنده کړه چې د يو احتمالي توافق امکان شته، خو زياته يې کړه چې که دغه توافق هم وروستی نه شي، متحده ايالات به خپل عمليات ودرولي. د هغه په وينا، د واشنګټن پوځي ماموريت به «په لنډ وخت» کې بشپړ شي.
ولسمشر ټرمپ په خپلو نورو څرګندونو کې وويل چې ايران بدلون موندلی او ادعا يې وکړه چې متحده ايالاتو دا هېواد «د تيږو دورې ته بېرته اړولی»؛ خو تراوسه د ايران له چارواکو کوم رسمي غبرګون نه دی راغلی.
د ټرمپ تازه څرګندونې په داسې حال کې مطرح کېږي چې د ايران په اړه د هغه وروستۍ دريځونه په تېرو مياشتو کې د کورنيو او نړيوالو پراخو غبرګونونو سره مخ شوي او شنونکو د دغو څرګندونو پر امنيتي او سياسي پايلو اندېښنه ښودلې ده.
