د چابهار له لارې درې اړخیز اقتصادي غونډه د همکارۍ د پیاوړتیا لپاره جوړه شوه
د سیمې د اقتصادي اړیکو د پراخېدو د هڅو په دوام، یوه درې اړخیزه غونډه د افغانستان یو شمېر سوداګرو، په هند کې د ایران سفیر، او په کابل کې د ایران د سفارت سرپرست په ګډون د ایران په چابهار آزادې سیمې کې جوړه شوه.
دا غونډه د چابهار د آزادې سیمې د سازمان د مشرتابه بورډ مشر، ډاکتر محمد سعید اربابي، په کوربتوب جوړه شوې وه، چې موخه یې د ایران، افغانستان او هند ترمنځ د سوداګریزو، اقتصادي او ترانزیتي همکاریو د فرصتونو او ننګونو ارزونه وه.
په دې غونډه کې، په هند کې د ایران سفیر محمد فتحعلي او په افغانستان کې د ایران د سفارت سرپرست علیرضا بیکدلي، د چابهار بندر ستراتیژیک اهمیت ته په اشارې سره، دغه بندر د سیمې د هېوادونو، په ځانګړي ډول ایران، افغانستان، هند او د مرکزي آسیا هېوادونو ترمنځ د وصل اساسي کړۍ وبلله، او د ترانزیت د اسانتیاوو د رامنځته کولو لپاره یې مهم وباله.
په خبرو اترو کې داسې موضوعات راپورته شول: د ترانزیتي زیربناوو پراختیا، د ګډو لوجستیکي او بیمهيي شرکتونو رامنځته کول، د تهاتري تړونونو د لاسلیک زمینه برابرول، د څو وارې د ننهوتو ویزو ورکول او د سوداګرو لپاره د سیاحتي ویزو لغوه کول.
همداراز، د باروړونکو موټرو لپاره د تګ راتګ جواز ورکول، او د ایران او هند له پوهنتونونو سره د ګډو ښوونیزو پروګرامونو ترسرهکولو مسئلې هم وڅېړل شوې.
د افغانستان اقتصادي فعالانو د دغې غونډې پر مهال، د نويو سوداګریزو فرصتونو پر پرانیستو هیلهمندي وښوده او د طالبانو له ادارې یې وغوښتل چې د چابهار بندر له لا ډېرو ظرفیتونو د ګټې اخیستنې په موخه، اداري خنډونه لیرې کړي.
د غونډې په پای کې ګډونوالو پر دې ټینګار وکړ چې درې اړخیزې همکارۍ ته باید یوه روښانه او دوامداره اقتصادي لیدلوره ترسیم شي.
