د طالبانو د کار وزارت له مسلکي زدکوونکو د یوې ډلې فراغت اعلان کړ
په کابل کې د یوه رسمي مراسمو پرمهال، د طالبانو د کار او ټولنیزو چارو وزارت مرستیال د مسلکي زدکوونکو د یوې ډلې فراغت اعلان کړ. نوموړي وویل، دغه فارغان په برقکشي، خیاطي، نلدواني او نورو عملي او تخنیکي برخو کې زدهکړې ترلاسه کړې دي او اوس کولای شي د کار بازار ته داخل شي.
محمد زاهد احمدزی، د یاد وزارت مرستیال، زیاته کړه چې یتیمانو، بېسرپرسته کسانو، د جګړې قربانیانو کورنیو او معلولینو ته د کار زمینه برابرول د دغه وزارت له اصلي پروګرامونو څخه دي. ده ټینګار وکړ چې وزارت هڅه کوي په دغو برخو کې اغېزمنې کړنې ولري.
احمدزي وویل چې د طالبانو اداره په ټول هیواد کې زیانمنو ټولنیزو ډلو ته، لکه بېرته راګرځول شویو معتادینو او جګړه ځپلو معلولینو ته، مسلکي او تخنیکي روزنې برابرې کړې دي. ده زیاته کړه: “زموږ مسوولیت دی چې دغې قشر ته د کار زمینه مساعده کړو او هڅه کوو چې هیڅ ډول لنډون پکې رانه شي.”
په ورته وخت کې، څو تنه فارغان چې د فراغت سندونه یې تر لاسه کړل، وايي سره له دې چې شپږ میاشتني کورسونه یې بشپړ کړي، لا هم د خپلو مهارتونو مطابق د کار فرصتونو ته اړتیا لري. شمشاد رحیمي، یو له دغو فارغانو څخه وویل: “موږ مننه کوو چې دا ډول فرصتونه برابر شوي، خو غوښتنه مو دا ده چې دا پروګرامونه دوام وکړي او موږ ته د کار زمینه هم برابره شي.” عبدالمنیر واحدي هم له مسؤلینو غوښتنه وکړه چې فارغانو ته دې د دوی د زدهکړو پر بنسټ د کار چانسونه برابر کړي.
همداراز، محمد جوادي، یو بل فارغ، وویل چې دا ډول فني پروګرامونه کولای شي د ځوانانو وړتیاوې لوړې کړي او له جبري مهاجرتونو یې وژغوري. ده ټینګار وکړ چې د دغو پروګرامونو دوام د افغانستاني ځوانانو ترمنځ د بېکارۍ د کموالي لپاره اړین دی.
خو، د ټولنیزو چارو یو شمېر کارپوهان باور لري چې تر دې دمه د طالبانو اداره نهده توانېدلې چې د تخنیکي زدهکړو مرکزونو د زرګونو فارغانو لپاره واقعي کاري زمینې برابرې کړي، او د فعال کار بازار نشتون لامل شوی چې ډېری دغو ځوانانو له فراغت وروسته بیا هم د بېکارۍ له ستونزې سره مخ شي.
د مراسمو په پای کې، د طالبانو د کار وزارت مرستیال له نورو چارواکو سره یو ځای فارغانو ته د فراغت سندونه ورکړل.
