د طالبانو د کورنیو چارو د امنیتي معین پټ سفر پنجشېر ته؛ د امنیتي وضعیت ارزونه شوې
محلي سرچینې په پنجشېر کې تاییدوي چې د طالبانو د کورنیو چارو وزارت امنیتي معین، ابراهیم صدر، دې ولایت ته سفر کړی او د دوشنبې په ورځ (۲۴ د قوس) یې له سیمهییزو چارواکو سره امنیتي ناسته ترسره کړې ده. دا غونډه پداسې حال کې شوې چې د پنجشېر امنیتي وضعیت یو ځل بیا د پام وړ شوی دی.
سرچینې زیاتوي، دا ناسته د طالبانو د والي په دفتر کې د سختو امنیتي تدابیرو تر سیوري لاندې، پټه توګه ترسره شوې. د غونډې همزمان، د طالبانو ځواکونو هغه سړک چې د ولایت مقام ته رسېږي، د خلکو او دولتي ادارو مراجعینو پر مخ تړلی؛ یو اقدام چې د خلکو له خوا له نارضایتۍ سره مخ شوی دی.
دا سفر شاوخوا یوه اونۍ وروسته له هغې ترسره کېږي چې د «د افغانستان ملي مقاومت جبهې» پورې تړلې یوه حمله د طالبانو پر یوه قرارګاه په پنجشېر کې وشوه. یادې جبهې تیره اونۍ ادعا وکړه چې د دره ولسوالۍ د عبداللهخېل درې د منجستو کلي پر یوه طالبانې قرارګاه برید کې یې ۱۷ طالبان وژلي دي؛ خو د طالبانو سیمهییزو چارواکو دا ادعا رد کړې ده.
محلي سرچینې وايي چې ابراهیم صدر د یکشنبې ورځې ناوخته پنجشېر ته ورداخل شو او ورسره سم عمومي سړک د موټرو پر مخ وتړل شو. د دغو سرچینو په وینا، د سفر اصلي هدف د پنجشېر امنیتي وضعیت ارزونه او د ژمي په موسم کې د وسلهوالو مخالفانو فعالیتونو مخنیوی دی.
پنجشېر چې د کابل په شمال کې موقعیت لري، ژمنی ساړه او د واورې ډېر اورښت لري. سرچینې زیاتوي چې ډېر طالبانې پوستې په غرنیو سیمو کې موقعیت لري او له یخنۍ سره، د طالبانو ځواکونه له جدي لوژستیکي او امنیتي ستونزو سره مخامخ کېږي؛ یوه وضعه چې شنونکي باور لري کولای شي د طالبانو د وسلهوالو مخالفانو د فعالیت لپاره زمینه برابره کړي.
