په دوحه کې د استرالیا او اروپايي ټولنې ځانګړو استازو د افغانستان په اړه غونډه وکړه
په قطر کې د دوحې ښار په کوربتوب، د استرالیا د افغانستان لپاره ځانګړې استازې، امنډا مکګرگور، د اروپايي اتحادیې د افغانستان لپاره له ځانګړي استازي ژیل برتران سره غونډه وکړه.
د استرالیا د افغانستان لپاره سفارت په وینا، دغه غونډه یوه اغېزمنه موقع وه چې د امنیت، مهاجرت، بشري حقونو او نورو افغانستان پورې اړوندو مهمو مسایلو په اړه د نظرونو د تبادلې او د حللارو د ارزونې زمینه یې برابره کړه.
په داسې حال کې چې طالبان په پراخ ډول د بشري حقونو د ښکاره نقض او د عامه آزادیو د ځپلو په تورونو تورن دي، دا ډول دیپلوماتیکې لیدنې کولی شي د افغانستان د روانو ستونزو پر وړاندې د نړیوالې همغږۍ پراخولو لاره هواره کړي.
د استرالیايي او اروپايي چارواکو دا ناسته له افغانستان څخه بهر یو ځل بیا دا څرګندوي چې د طالبانو تر واک لاندې اوسنی وضعیت د هېواد له دننه د ملي ډیالوګ او نړیوالو اړیکو زمینې محدوده کړې ده.
