د طالبانو نوی امر: د تيلو پيرود يوازې له جوازلرونکو شرکتونو
د طالبانو د ادارې يو مامور هيئت ويلي چې د ټيټ کيفيت لرونکو تيلو د مخنيوي لپاره، ټول د تيلو ټانکونه او پمپ سټېشنونه بايد يوازې له هغو شرکتونو تيل او ګاز واخلي چې رسمي جواز لري او د پلورونکي اسناد له ځان سره وساتي. دغه هيئت خبرداری ورکړی چې که د پلټنې وروسته څرګنده شي چې ټيټ کيفيت لرونکي تيل په ټانکونو کې شتون لري، قانوني اقدام به وشي.
په يوه خبرپاڼه کې چې د چهارشنبې، د دلو په ۲۹مه خپره شوې، له سوداګرو او وارداتي شرکتونو غوښتنه شوې چې تيل او مايع ګاز د “نافذه معيارونو او اصولو” مطابق وارد کړي. د دې خبرپاڼې له مخې، که څوک سرغړونه وکړي، ياده موضوع به د هبتالله اخندزاده د سپارښتنې له مخې اړوندو ادارو ته ور وپېژندل شي.
هيئت زياته کړې چې د بازار څارنه به په دوامداره توګه روانه وي او ټاکل شوي معيارونه به په ټوله هېواد کې عملي کېږي. خو تر اوسه د څارنې د څرنګوالي او د تيلو د کيفيت د ارزونې په اړه جزيات نه دي ورکړل شوي.
د طالبانو له بيا واکمنېدو وروسته، دغه اداره د نفتې توکو او مايع ګازو پر وارداتو پراخ بنديزونه وضع کړي دي. يو شمېر سوداګرو مخکې ويلي چې د جواز د وېش او څارنې بهير کې د شفافيت نشتوالی د وارداتو بهير ستونزمن کړی او په مارکېټ يې فشار زيات کړی دی؛ دا موضوع کولای شي د انرژۍ پر بيې او د خلکو پر لاسرسي اغېز ولري.
