د طالبانو د رئيسالوزرا دفتر مشر د افغانستان له صرافانو اتحاديې سره وکتل
ډاکتر ملا عبدالواسع خادم، چې د طالبانو د رئيسالوزرا د دفتر عمومي رئيس دی، په کابل کې د افغانستان د صرافانو او مالي خدمتونو له اتحاديې له مسؤلينو او غړو سره وکتل او خبرېاترې يې وکړې. د دې کتنې اصلي محور د پولي بازار حالت او د صرافانو رول د هېواد په مالي دوران کې بلل شوی دی.
ښاغلي خادم وويل چې سرای شهزاده د افغانستان د ټولو اوسېدونکو ګډه شتمني ده او د يو له مهمو مالي تبادلو مرکزونو څخه ګڼل کېږي. هغه زياته کړه چې هر ډول نظم، اصلاح او پرمختګ په دې ساحه کې کولای شي د هېواد پر اقتصادي وضعيت مستقیم اغېز ولري. نوموړي ټینګار وکړ چې د دغه مرکز د اعتبار او مقام ساتنې لپاره جدي پام او قوي مدیریت ته اړتیا ده.
د رئيسالوزرا د دفتر مشر ډاډ ورکړ چې د صرافانو د اتحاديې لهخوا وړاندې شوې غوښتنې او وړانديزونه به وڅېړل شي، او ټینګار یې وکړ چې د دې برخې د کورنیو ستونزو حل بايد د صرافانو خپلمنځي همکارۍ او تفاهم له لارې ترسره شي.
په همدې وخت کې، د افغانستان د صرافانو او مالي خدمتونو د اتحاديې مسؤلينو خپلې اندېښنې او نظرونه څرګند کړل او د طالبانو د ادارې له لوري د دې سکتور د ستونزو د حل هڅې وستايل؛ خو هغوی يو ځل بيا ټینګار وکړ چې په مالي برخه کې روڼتيا، د مقرراتو ثبات او د وړاندوينې وړ پرېکړې بنسټيز اهميت لري.
