ګارډین: له ایران سره پوځي تاوتریخوالی د اقتصادي ودې هیله کمه کړې ده
د ګارډین ورځپاڼې په یوه راپور کې راغلي چې د امریکا، اسراییلو او ایران ترمنځ د پوځي تاوتریخوالي زیاتوالی، له دې سره هممهاله د نفت او ګازو د بیو لوړېدل، د نړيوال اقتصاد د ښه کېدلو هیله کمه کړې ده. د دې ورځپاڼې په وینا، اقتصادپوهان خبرداری ورکوي چې که جګړه دوام وکړي، د اقتصادي ودې پخوانۍ وړاندوینې عملي کېدای نه شي.
د راپور له مخې، د نړيوال وجهي صندوق مشرې، کريستالينا جورجیوا، ویلي چې د انرژۍ د بیو لس سلنه زیاتوالی کولی شي نړیوال انفلاسیون ۴۰ بنسټیزې واحدونه لوړ کړي او د نړيوال اقتصاد وده ۰.۱ تر ۰.۲ سلنه کمه کړي. دا څرګندونې په داسې حال کې شوي چې د وروستیو بدلونونو له امله د انرژۍ بازارونه له بدلونونو سره مخ دي.
د ګولډمن ساکس اقتصادپوه، لرد جېم اونیل، هم ویلي چې سپینه ماڼۍ د ایران سره د شخړې جیوپوليټیک اړخونو ته کافي پاملرنه نه ده کړې. د هغه په باور، د دغو تاوتریخوالو پایلې یوازې پوځي اړخ نه لري، بلکې نړیوال اقتصاد هم اغېزمنوي.
بلومبرګ اکنوميکس اټکل کړی چې د نفتو په عرضه کې هر یو سلنه کمښت شاوخوا څلور سلنه د بیې لوړوالی راولي. همدارنګه د «آکسفورډ اکنوميکس» بنسټ وړاندوینه کړې چې د کال تر پایه په برېتانیا او د یورو په سیمه کې انفلاسیون د پخوانیو اټکلونو په پرتله ۰.۵ تر ۰.۶ سلنه لوړ وي.
ګارډین زیاته کړې چې د برېنټ خامو نفتو د ۱۷ سلنه بیې زیاتوالي او د بنزین د لوړې بیې وروسته، د امریکا وګړي اوس د دغو تاوتریخوالو اقتصادي اغېزې په مستقیم ډول احساسوي؛ هغه موضوع چې د کورنیو پر اقتصادي وضعیت او د حکومت پر پالیسیو اغېزه لرلای شي.
