په شماللويديځ زون کې د کډوالو د ستونزو په تړاو د طالب چارواکو همغږي ناسته وشوه
د طالبانو د بلخ ولایت ریاست د ملا محمد یوسف وفا په مشرۍ د هېواد د شماللويديځو ولایتونو له چارواکو سره یوه ناسته ترسره کړه، چې هدفيې د راستنېدونکو کډوالو د وضعیت ارزونه او د ښهوالي لپاره د حللارو وړاندې کول وو.
د طالبانو د کورنیو چارو وزارت د معلوماتو له مخې، په دې ناسته کې د راستنېدونکو کډوالو لپاره د اسانتیاوو د رامنځته کولو، د سرحدونو د امنیت تامین، او د طالبانو د مشرتابه د فرمانونو د تطبیق په اړه خبرې وشوې. همدارنګه، د سرحدي سیمو لپاره د یو زر کسیزې قطعې د جوړېدو موضوع هم مطرح شوې ده.
ملا یوسف وفا، په دې ناسته کې په خپله وینا کې د طالبانو تر مشرۍ لاندې د «شرعي نظام» پر پیاوړتیا ټینګار وکړ او د سمنګانو ولایت له چارواکو څخه د ناستې د کوربهتوب مننه وکړه. هغه دغه راز یادونه وکړه چې یو ګډ هیأت به جوړ شي تر څو د خلکو ستونزې وڅېړي او یو ځانګړی تماس شمېره به د شکایتونو د راټولو لپاره فعاله شي.
دا ناسته په داسې حال کې ترسره شوې چې له ګاونډیو هېوادونو څخه د افغان کډوالو پراخ بېرته راستنېدنه د پولو پر سیمو د خلکو پر ژوند او ټولنیزو خدماتو فشارونه زیات کړي دي؛ خو د طالبانو اړوندو ادارو تر دې دمه نهدي توانیدلي چې د دغو بېرته راستانه شویو وګړو اساسي اړتیاوې پوره کړي.
په دې ناسته کې د نورو ولایتونو والیانو او سیمهييزو چارواکو هم خپل نظرونه او وړاندیزونه شریک کړي دي، خو تر اوسه د دې خبرو مشخصې پایلې نهدي اعلان شوې، او لا هم ډیری کډوال او ځایي خلک له ګڼو ستونزو سره مخ دي.
