د طالبانو اداره د درملو د بیې د نوي پلان د پلي کولو خبر ورکوي
د طالبانو د عامې روغتيا وزارت د خوراک او درملو د رياست مرستيال ويلي چې د درملو د بيې ټاکلو نوی لایحه به ډېر ژر په ټول هېواد کې عملي شي. د ده په وينا، د دغه لایحې موخه دا ده چې د درملو د لوړو بېو مخه ونيول شي.
مولوي حمدالله زاهد زياته کړې چې د دې لایحې له پلي کېدو وروسته به د درملو نرخونه تر څارنې لاندې وي څو د بېحده بيې لوړېدو مخه ونيول شي. په وروستيو کلونو کې، د بېلابېلو ولايتونو اوسېدونکو د درملو د لوړې بيې او د مؤثرې څارنې له نشتوالي شکايتونه کړي دي.
نوموړي همدارنګه خبرداری ورکړی چې که له بهر څخه د ټيټې کيفيت لرونکي يا د فرمایشي درملو واردات وشي، اړوند شرکتونه او فابريکې به تور ليست ته داخل شي. د ده په وينا، د طالبانو اداره به د بېکيفيته درملو پر وړاندې جدي چلند وکړي.
دغه مرستيال زياته کړه چې د پاکستان څخه د درملو واردات هم د ځينو زيانرسوونکو شيانو له امله درول شوي دي. نوموړي ادعا وکړه چې په دې اړه مستند اسناد موجود دي.
کارپوهان د روغتيا په برخه کې ټينګار کوي چې روڼ نظارت، معياري ازموينې او د خلکو د کيفيت لرونکو درملو ته لاسرسی د هېواد د روغتيايي نظام له بنسټيزو اړتياوو څخه دي. د دوی په وينا، د دغو موخو پلي کېدل اغېزمن مديريت او د اړوندو ادارو روښانه ځوابويون ته اړتيا لري.
