د طالبانو د انرژۍ او اوبو وزارت د ۲۵ ولایتونو د سېلابونو خبرداری ورکړ
د طالبانو د انرژۍ او اوبو وزارت اعلان کړی چې له چارشنبې تر جمعې پورې به د منځني او شدیدو بارانونو له امله د ناڅاپي سېلابونو خطر د هېواد بېلابېلې برخې ونیسي. دغه خبرداری د هریرود-مرغاب، هلمند، شمالي او کابل د سیندونو حوزو، همدارنګه د دې سیمو ګاونډیو او سیلابي دښتو لپاره ورکړل شوی دی.
د دې وزارت د اېکس (X) پاڼې له خبرپاڼې سره سم، د اوبو د سطحې د لوړوالي او د سېلاب د رامنځته کېدو احتمال د غور، فاریاب، زابل، ارزګان، جوزجان، سرپل، بلخ، سمنگان، پنجشیر، پروان، کابل، لوګر، میدان وردګ، غزني، پکتیا، خوست، پکتیکا، ننګرهار، کنړ، نورستان، بغلان، کندز، تخار او بدخشان په ولایتونو کې هم اټکل شوی دی. ویل شوي چې نور سېلابي سیمې هم له خطر سره مخ دي.
وزارت له دغو سیمو اوسېدونکو غوښتي چې د اوبو د لوړوالي او د سېلابونو د بهېدو پر مهال د سیندونو له غاړو لرې پاتې شي. همدارنګه ټینګار شوی چې که د اوبو د کچې زیاتوالی یا سېلاب په لاندې سیمو کې مشاهده شي، باید سمدستي ځایي چارواکو ته خبر ورکړل شي، څو د احتمالي تلفات څخه مخنیوی وشي.
افغانستان هر کال د بارانونو په موسم کې د ناڅاپي سېلابونو له ګواښ سره مخ کېږي؛ هغه پېښې چې د جغرافیایي موقعیت او د زیربناوو د کمزورۍ له امله کولی شي د پام وړ مالي او انساني زیانونه رامنځته کړي.
