د طالبانو د امر بالمعروف وزير د افغانستان له عالي شيعه کمېسيون سره وکتل
د طالبانو د امر بالمعروف او نهی عن المنکر وزارت ويلي چې د دې وزارت وزیر محمد خالد حنفي د افغانستان د شيعهګانو له عالي کمېسيون سره لېدلي او دواړو خواوو د مذهبي همغږۍ او ګډو همکاريو په اړه خبرې کړې دي. د وزارت د وياند په وينا، د شيعهګانو عالي کمېسيون په دغه غونډه کې ټینګار کړی چې د افغانستان د شيعه ټولنه د طالبانو د مشرتابه له موخو سره د اسلامي ارزښتونو د ترويج په برخه کې همغږې ده.
سيف الاسلام خيبر، د امر بالمعروف وزارت وياند، د چهارشنبې په ورځ د حوت ۲۷مه په يوې خبرپاڼه کې ويلي چې په دې غونډه کې د شيعهګانو د عالي کمېسيون تر غړو سربېره، د استخباراتو رياست، د حج او اوقافو وزارت، د علماوو شورا، د کابل ښاروالۍ او يو شمېر نورو اړوندو بنسټونو استازي هم حاضر وو.
د خبرپاڼې له مخې، محمد خالد حنفي د خلکو او ديني بنسټونو نږدې همکاري د طالبانو د ادارې د موخو د تحقق لپاره ضروري بللې ده. نوموړي ادعا کړې چې ځينې مغرضې کړۍ هڅه کوي چې د افغانستان د مسلمانانو او د بېلابېلو مذهبونو د پلويانو ترمنځ اختلافات رامنځته کړي.
د امر بالمعروف وزير همدارنګه د اهل سنت او شيعه مذهبو له پلويانو غوښتنه کړې چې د هغه څه د پياوړتيا لپاره چې «اسلامي وحدت» بلل شوی، بايد يو له بل سره همغږي ولري. دا ليدنه په داسې حال کې ترسره کېږي چې په وروستيو کلونو کې د مذهبي ازاديو او د بېلابېلو مذهبي ډلو د برابر ګډون په اړه اندېښنې مطرح شوې دي. دغه موضوع که څه هم د طالبانو له خوا تل رد شوې، خو د ځينو ټولنيزو فعالانو له لوري پر هغې پوښتنې راپورته شوې دي.
د شيعهګانو عالي کمېسيون د ځينو شيعه بنسټونو له خوا د طالبانو د استخباراتي شبکې يوه برخه او د دغه ډلې د تګلارو د تطبيق وسيله بلل کېږي. ګڼ شمېر د شيعه ټولنې څېرې دغه کمېسيون غيرمشروع بللی دی.
