طالبانو د کابل اداري کمپلېکس طرحې ارزونې او د روغتيايي ستونزو حل لپاره پلاوي وټاکل
د طالبانو د حکومت مرستيال وياند ويلي چې د ملا محمد حسن آخند، د رئيس الوزرا په مشرۍ د کابينې په پنځلسمه غونډه کې پرېکړه وشوه چې يو ځانګړی پلاوی د کابل ولايت د اداري کمپلېکس د جوړولو د طرحې د ارزونې لپاره وټاکل شي. د حمدالله فطرت په وينا، دا کمپلېکس به د ده سبز ولسوالۍ د تريخېل تنګي په سیمه کې جوړېږي.
د خپرو شوو معلوماتو له مخې، ياد پلاوی دنده لري چې د ودانۍ طرحه او د پروژې بېلابېل اړخونه وڅېړي او د ارزونې پایلې د طالبانو مشرتابه ته وړاندې کړي. تر اوسه د دې پروژې د پيل نېټه او لګښت په اړه جزئيات نه دي خپاره شوي.
همدارنګه، په همدې غونډه کې يو بل پلاوی د ملا عبدالسلام حنفي، د رئيس الوزرا اداري مرستيال، په مشرۍ وګومارل شو څو له روغتيايي سکتور اړوندو ادارو سره خبرې وکړي. د ياد اقدام هدف د روغتيايي کارکوونکو پر وړاندې د موجودو ستونزو څېړل او د هغوی د هوارۍ لپاره د وړانديزونو چمتو کول بلل شوي دي.
دغه پرېکړې په داسې حال کې اعلانېږي چې د افغانستان روغتيايي سکتور په وروستيو کلونو کې له پراخو ستونزو، د تجهيزاتو له کمښت او د کار له زيات فشار سره مخامخ دی. تمه کېږي چې د دغو ارزونو پايلې په روښانه ډول له خلکو سره شريکې شي، څو د طالبانو د حکومت د ژمنو د عملي کېدو اندازه ارزول کېدای شي.
