د طالبانو د رهبرۍ تر منځ د اختلافاتو ادعاوې رد شوې
د طالبانو د کورنیو چارو وزارت اداري معین، رحمتالله نجیب، د میدان وردګو ولایت د پولیسو د فراغت په مراسمو کې وویل چې د طالبانو د مشرانو ترمنځ هېڅ ډول اختلاف شتون نه لري او د دې ډلې مشران د مقام یا څوکۍ لېوالتیا نه لري.
هغه د “د هېواد د دښمنانو” په تور وینا وکړه او ویې ویل چې ځینې ډلې د بهرنيو ملاتړ سره هڅه کوي افغانستان بېثباته او ناامنه کړي. د نوموړي په وینا، دغه هڅې به ناکامې وي او طالبان د هر ډول ګواښ پر وړاندې بیداره دي.
نجیب زیاته کړه چې د طالبانو هېڅ یو لوړپوړی چارواکی د ملا هبتالله اخندزاده د ځای ناستي کېدو هڅه نه کوي او له خلکو یې وغوښتل چې د شایعاتو تر تأثیر لاندې نه شي. دا څرګندونې په داسې حال کې مطرح کېږي، چې په وروستیو میاشتو کې د طالبانو د مشرانو ترمنځ د نظر اختلافونه علني شوي دي.
د کورنیو چارو وزارت د معین دغه څرګندونې وروسته له هغې کېږي چې د دې وزارت سرپرست، سراجالدین حقاني، په خپلو څرګندونو کې د طالبانو په واکمن ساختار کې د “تاوتریخوالي، سپکاوي او وېرې خورولو” له موجودیته نیوکې کړې وې؛ داسې خبرې چې د طالبانو له رهبري سره نژدې څېرو غبرګونونه پارولي دي.
په ورته وخت کې، د طالبانو د لوړو زده کړو وزیر، مولوي نداء محمد ندیم، د دې ډلې له مشر سره پر بشپړې اطاعت ټینګار کړی دی.
رحمتالله نجیب په خپلو خبرو کې دا هم وویل چې د افغانستان خلک له دموکراسۍ او ولسواکه نظام څخه ملاتړ نه کوي او بېرته د داسې نظام جوړېدل یې “بېمعنا خیال” وباله. دا څرګندونې په داسې حال کې کېږي چې د افغانانو د سیاسي ګډون، اساسي حقونو او د واک د انحصار پای ته رسولو غوښتنې په تېرو کلونو کې ډېرې مطرح شوي، خو له کله چې طالبان بېرته واک ته رسېدلي، دا غوښتنې په پراخ ډول محدودې شوې دي.
